Pavlodarda 2 qabatty úıden órt shyǵyp, saldarynan 1 jasar bala kóz jumdy. Bul týraly Oblystyq tótenshe jaǵdaılar departamenti málimdedi, dep habarlaıdy “Adyrna” tilshisi.
Oblystyq tótenshe jaǵdaılar departamentiniń málimetinshe, 10 jeltoqsanda saǵat 17.57-de 101 pýltine órt týraly habarlama túsken. Órt Pavlodar qalasy, Ýsolskıı yqshamaýdanynda 2 qabatty kirpishten qalanǵan jeke turǵyn úıden shyqqan.
“Oqıǵa ornyna barǵan kezde úıdiń 1-qabatyndaǵy hollda 4 sharshy metr aýmaqta 2 oryndyq, kilem, ekinshi qabatqa aparatyn aǵash baspaldaq janyp ketkeni anyqtaldy. Barlaý kezinde zaldan kúıgen balanyń máıiti tabyldy (2021 jyly týǵan ul bala)”, – delingen habarlamada.
Úıde 5 jasar ul men 14 jasar qyz bala bolǵany belgili boldy, dárigerler olarǵa «Kúızeliske túsý»dıagnozyn qoıǵan.
Órt 18 saǵat 47 mınýtta joıyldy. Órtti sóndirýge 5 birlik tehnıka men 16 adam jumyldyryldy.
TJD qyzmetkerleri balalardy eresekterdiń qaraýynsyz qaldyrmaýdy eskertedi.
