Qoǵam qaıratkeri, ólketanýshy, metallýrg Tólegen Búkirov mereıli 70 jasqa tolyp otyr. Kıeli de qasterli Ulytaý ólkesinde týǵan Tólegen aǵamyzdyń mereıtoıyna arnalǵan quttyqtaýlar legi men óleń joldaryn nazarlaryńyzǵa usynamyz.
Qurmetti Tólegen Nurmaǵanbetuly!
Mereıli bıigińiz qutty bolsyn! Bul kúnge Siz talaı jyldar boıy el qamy úshin jasaǵan eńbegińizdiń saýabyn jınap, abyroıly qyzmetińizdiń jemisin, úrim – butaqtyń qyzyǵyn kórip jetip tursyz. Biz Sizdi jas kezimizden qoǵamnyń isine belsene aralasyp, ulttyń taǵdyryna beıjaı qara almaıtyn tulǵa retinde tanyp kelemiz. Sonaý sekseninshi jyldardyń sońynan bastap Jezqazǵan jurtshylyǵyn aımaqtyń, eldiń ózekti máselelerine jumyldyryp, kóptegen ıgi bastamalardyń basy-qasynda júrsiz.
Búgingi kúni Siz el aǵasy retinde tamyryn tereńnen alatyn tarıhymyzben búgingi jetistikterdi baılanystyratyn isterdiń kóshbasshysy bolyp, ózińizdiń osy jasqa deıin jınaǵan bedel, abyroıyńyzdy el ıgiligine jumsaýdyń taǵy bir qyryn kórsetip júrsiz. Qurmetti Tóke! Sizge zor densaýlyq, qajymas qaırat, baq pen baqyt tileımin.
Izgi nıetpen,
baýyryńyz Álıhan Baımenov
OSMII-AǴA
Bul óleńdi qaıratker aǵamyz Tólegen Búkirovtiń 70 jasqa tolǵan toıyna arnaımyn.
Óshken bolar ol jyldar el esinen,
Biletinder ketti ǵoı kemesimen.
...Bir nárse izdep júrgensiz zaýyttaǵy
Gaz júretin qubyrdyń óńeshinen.
Kóńilińdi sendirip júrgende úmit,
Erteńińe shaqyrdy bir belgi nyq.
«Tamam jurtty tań qylar» demedi eshkim
Gaz qubyryn tazalap júrgen jigit.
Aldamady armanyń aq qanatty,
Tarıh ózi jazdy, aǵa, taqtaǵa atty.
Talmaı júrip Siz tapqan álgi osmıı
Jezqazǵanǵa jer jurtyn jalt qaratty.
Osmıı bop jarq etti ataǵyńyz,
Jańalyqqa qol soqty qataryńyz.
Osy kúıden aıyrmaı keledi áli
Osmııden bastalǵan saparyńyz.
Sodan beri tynshýdy bilmedińiz,
Ult dedińiz uran sap, til dedińiz.
Olja ekenin, aǵasy, bilesiz be
Ortamyzda taýdaı bop júrgenińiz.
Baılyǵyńyz - orman, taý, jer men kóliń,
Paıda tabý jat saǵan elden tegin.
Kókiregińde - qobyzy Ketbuqanyń,
Sanańyzda - taǵdyry kendi ólkeniń.
Patshalyǵyn jasady saǵan Aryń,
Sol Aryńdy barym dep baǵaladyń.
Tún uıqyńdy tórt bólgen shyǵar talaı
«Tórt bosaǵa» atanǵan babalaryń.
Ómirińnen kóremiz erlik izdi,
Sol izbenen bastaı ber endi bizdi.
Júz jyldan soń qoısa eken urpaǵyńyz
Osmııden jasatyp belgińizdi.
Keıitse ómir, ketkende bezerip óń,
Janymyzdy jazamyz sóz emimen.
Biz de, aǵasy, áldene izdep júrmiz
Ómir deıtin qubyrdyń ózeginen.
Ýaqyttyń ózgeshe kúıi múlde,
Sol órlik tur ustanym-túıinińde.
Tórt babańdaı tórelik jasa, aǵasy,
Jetpis jastyń turyp ap bıiginde.
Inilik izgi tilekpen
Ǵazız Eshtanaev,
Qazaqstan Jazýshylar odaǵynyń múshesi.
Aǵalardyń asyly!
(Eldiń Qurmetti azamaty, ólketanýshy, tehnıka ǵylymdarynyń kandıdaty,óner janashyry Tólegen Nurmaǵanbetuly Búkirovtyń 70 jyldyq mereıtoıyna jyr shashý)
1.Sózden kórmegen irkilip,
Aıtpaıdy áste kúpirlik.
Qurmetine eldiń bólengen,
Tólegen aǵa Búkirov.
2.Qanynda bar tektilik,
Jaratqan ıem epti ǵyp.
Týǵan jerdiń taǵdyryna,
Turady dáıim shep quryp.
3.Elin júrekpen súıgen er,
Kóshbasshy aǵamyz súıener.
Ardaqtyma qaryzdar,
Tarıhı bul kıeli jer.
4.Tarıhty alǵa súıredi,
Qyzmet etti júıeli.
Rýhyn qaıta oraltty,
Ketbuqadaı bılerdi.
5. Kezi joq bilemiz ant buzǵan,
Ǵylymda da aty ozǵan.
Urpaq kádesine jarasyn,
Kóz maıyn taýysqan qol jazbań.
6.Ár salanyń bilgiri,
Isinde joq bir mini.
Týǵan ólkege baılanǵan,
Jaqsy aǵanyń kindigi.
7. Búgingi kúngi bek der em.
Jany egiz osy ólkemmen.
Salıqaly aǵanyń,
Oryny bar tek tórden.
8. Osy betten bir tanbaı,
Eńbegin kórgen joq buldap-aı.
Bedeldi erdiń birisiz,
Maqtaıdy jurt kóp syrttandaı.
9. Qazynasy osy eldiń.
Tókeńmen alǵa mol senim.
Kemeldik jas qut bolsyn,
Tólegen aǵam dúr meniń!
Iztóleý BEKENULY TÚSIPOV
Aqyn, QR Jýrnalıster Odaǵynyń múshesi,
«Halyq Alǵysy» medaliniń ıegeri.
«Adyrna» ulttyq portaly Jezqazǵan sırek metall óndirisiniń órkendeýine úles qosqan ǵalym Tólegen Nurmaǵambetulyn mereıli jasymen shyn júrekten quttyqtaıdy! Otbasyńyz aman, denińiz saý bolsyn!
"Adyrna" ulttyq portaly
