Búginge deıin qyzylordalyqtar elektr energııasy máselesine alańdap keldi. Sebebi qaladaǵy elektr jylý ortalyǵy 50-60 jyldan beri úzdiksiz jumys jasaǵandyqtan, elektr jelileriniń de ábden tozyǵy jetken. Bul sózsiz elektr júktemesine salmaq salady. Ózekti máselelerdi óz ýaqytynda nazarǵa alǵan aımaq basshysy Nurlybek Nálibaev Energetıka mınıstrligimen tıisti jumystardy atqaryp, birlesken túrde ońtaıly sheshim qabyldady.
Nátıjesinde Syr elinde buryn-sońdy bolmaǵan zamanaýı úlgidegi qýattylyǵy 240 megavatqa jetetin elektr ortalyǵy salynbaq.
Mamyr aıyndaǵy Syr eline sapary barysynda mınıstr Bolat Aqsholaqov mundaı múmkindik alǵash bolyp Qyzylorda óńirinde bastaý alǵanyn tilge tıek etken edi. Taıaýda ǵana nysan qurylysyn júrgizetin ınvestor kompanııa anyqtalyp, alǵashqy jumystar bastalsa, búgin arnaıy jıynda Nurlybek Nálibaev ınvestor túrik kompanııasynyń ókilderimen kezdesip, jobanyń júzege asyrý máselelerin qarady.
Otyrysqa jańa jylý ortalyǵynyń ınvestory «Aksa Enerdjı» túrik kompanııasynyń Qazaqstandaǵy basshysy Mýstafa Kemal men QR Energetıka mınıstrliginiń Jańartylatyn energııa kózderin qoldaý jónindegi qarjy-esep aıyrysý ortalyǵynyń dırektory Gúljan Qalıjanqyzy qatysyp, taraptar arasynda ekijaqty kelisim-shart jasaldy.
- Memleket basshysy Qasym-Jomart Kemeluly Toqaev Úkimettiń keńeıtilgen otyrysynda ońtústik óńirlerdi úzdiksiz elektr energııasymen qamtamasyz etý maqsatynda 3 jylda qýattylyǵy 1000 megavatt manervlik stanııalar salýdy tapsyrǵan bolatyn.
Jańa nysandy salý jerlesterim úshin aıtýly jańalyq dese de bolady. Igilikti iske qoldaý bildirgen mınıstr Bolat Aqsholaqovqa jáne sheteldik “Aksa Enerdjı” kompanııasynyń basshylyǵyna Syr jurtynyń atynan alǵysymdy bildiremin.
Aımaq tarıhyndaǵy mańyzdy jobanyń sapaly jáne ýaqytynda júzege asyrylýy úshin bar kúsh-jigerimiz ben múmkindikterimizdi jumsaıtyn bolamyz,-dedi N.Nálibaev.
Jıynda túrik kompanııasynyń Qazaqstandaǵy basshysy Mýstafa Kemal jańa nysan 2025 jyly el ıgiligine beriletinin jetkizdi.
“Bul jobanyń Qyzylorda úshin ǵana emes, Qazaqstanǵa da bereri mol bolady dep senemin. Keleshekte osy nysan energıkalyq qaýipsizdikti saqtaýǵa aıryqsha múmkindik beredi” dedi Mýstafa Kemal.
Basqosýda el aǵalary men energetıka salasynyń ardagerleri ıgilikti istiń alǵashqy qadamyna kýá bolyp, ǵasyrda bir salynatyn nysandy eldiń nesibesine balady.
«Aksa Enerdjı» túrik kompanııasy mazýt, tabıǵı gaz, jel generatorlary men sý elektr stanııalarynda elektr energııasyn óndirý salasyndaǵy álemdik tájirıbesi mol, jetekshi kompanııalardyń biri.
Aıtý kerek, jalpy quny 215 mlrd.teńgeden asatyn jańa nysan energııa jetispeýshiligin edáýir tómendetedi. Bul Táýelsizdik alǵan jyldary elimizde bıýdjetten tys qarjy kózderinen, ıaǵnı sheteldik ınvestorlardyń qarjysyna iske asyrylatyn eń aýqymdy teńdessiz joba!
Eske salaıyq, bıyl oblys boıynsha 23 áleýmettik nysannyń jylý qazandyǵy qaıta jańǵyrtylady. Osy jumystarǵa respýblıkalyq jáne oblystyq bıýdjetten 676 mln.teńge bólindi.
