Mänerlep syrǧanauşy Mihail Şaidorov Olimpiada chempiony atanǧannan keiın özıne jäne bapkerler qūramyna jalaqy töleu tolyq toqtatylǧanyn mälımdedı. Būl turaly sportşy Timur Balymbetovke bergen sūhbatynda aitty, dep habarlaidy «Adyrna» tılşısı.
Ol jaŋa mausymǧa daiyndalu uaqyty kelgenın jetkızdı.
«5 aidan berı maǧan jalaqy tölenbei keledı. Qazır kelesı mausymǧa daiyndaluym kerek, bıraq qalai daiyndalarymdy tüsınbeimın. Oqu-jattyǧu jiyndary josparlanǧan, baǧdarlamamdy qoiatyn künder de belgılengen. Baǧdarlama qoiu şyǧyndaryn tölei me dep bırneşe ret sūradyq. Är adam ärqalai söileidı. Maǧan eşteŋe tüsınıktı emes. Negızı men «menı qoldamaidy» dep aşyq aitqandy ūnatpaimyn. Jalaqymdy ne üşın jariialaǧandaryn da tüsınbeimın. Būǧan deiın eşqaşan mūndai mäsele kötermegenmın. Tek 2025 jyly maǧan qoldau kerek ekenın, mūz aidyny qajet ekenın aittym»,–dedı sportşy.
Şaidorov özıne qatysty qarjylyq aqparattyŋ jariia boluyn zaŋǧa qaişy dep sanaitynyn atap öttı.
«Negızı būl taqyrypta köp söilegendı ūnatpaimyn. Barlyǧymen qarym-qatynasym da kürdelı. Men tek damyp, syrǧanaǧym keledı. Men üşın elımızdıŋ altyn qoryndaǧy sportşy bolyp qalyp, kök tuymyzdy ärdaiym köterıp jüru maŋyzdy. Sebebı menıŋ äleuetım öte joǧary»,–dedı ol.
Aita keteiık, Mihail Şaidorov 2026 jylǧy Qysqy Olimpiadada Qazaqstanǧa mänerlep syrǧanaudan tūŋǧyş altyn medal syilaǧan bolatyn.
