Jetısu oblysynda balyq şaruaşylyǧy keşenınıŋ qūrylysy jürıp jatyr. Būl jobaǧa jeke investor 1 mlrd. teŋgege juyq investisiia saluda. Eskeldı audanyna barǧan jūmys sapary barysynda oblys äkımı Beibıt İsabaev atalǧan nysannyŋ qūrylysymen tanysty, dep habarlaidy Jetısu oblysy äkımınıŋ baspasöz qyzmetı.
Şaruaşylyq direktory Ruslan Safargaliev öŋır basşysyna jobanyŋ ıske asyru barysy turaly baiandap berdı. Onyŋ aituynşa, şaruaşylyq balyqtyŋ baǧaly türlerın jasandy ösırumen ainalysady. Mūnda tolyq öndırıstık–inkubasiialyq sikl atqarylady, iaǧni uyldyryqtan nemese şabaqtan bastap daiyn tauar türındegı balyqqa deiın ösırılıp şyǧarylady. Nysannyŋ qūrylysy ötken jyldan bastalǧan, biyl küzde aiaqtalady dep josparlanyp otyr.
- Uyldyryqty arnaiy Polşadan äkeldık. Şaruaşylyqta uyldyryqtan bastap özımız ösırıp daiyn balyqty tauar türınde ūsynamyz. Mūnan soŋ konservıleumen de, qaqtaumen de ainalysatyn bolamyz. Bır sözben aitqanda, barlyq öndırıstık prosestı özımız atqaramyz. Qazırgı kezde bır ǧimaratty salyp, ıske qostyq, mūnda bırkelkı temperaturada hanbalyq uyldyryqtarynan şabaq ösırılıp otyr. Mūndaǧy 1 mln 200 myŋ dana şabaq küzge qarai tauarly salmaǧyn jinap ülgeredı. Juyrda basqa da ǧimarattardy salyp, tūqy men bekıre tūqymdas balyqtardy ösıruge kırısemız, - dedı R.Safargaliev.
Atalǧan şaruaşylyqta balyqqa arnalǧan 93 bassein, sol siiaqty 63 sotyq jerde toǧan jasalady. Mūnda jylyna 80 tonnadan 1 myŋ tonnaǧa deiın önım şyǧarylady dep kütılude. Daiyn önımdı aldymen oblys kölemınde, keiın eldıŋ basqa öŋırlerıne de şyǧaru josparlanǧan.
Şaruaşylyqta qazır on ekı adam jūmysqa qabyldanǧan, sonyŋ 3-euı ihtiolog, 2-euı tehnolog maman. Nysan tolyq ıske qosylǧanda jūmyspen qamtylǧandar sany 30-ǧa jetedı. Solardyŋ bırı Dias Ruslanūly äkesıne şaruaşylyqta qolǧabys etu üşın ihtiolog mamandyǧyna oqyp kelgen.
- Balyq şaruaşylyǧynda jūmys ısteudı maqsat etıp, osy mamandyqta arnaiy oqydym. Mūnda qazır sudyŋ tazalyǧyn, temperaturasyn, kislorodyn baqylaimyz. Odan bölek balyqtyŋ azyqtyq koefisentın qadaǧalap, kündelıktı jem beremız, - dedı D. Ruslanūly.
Jalpy Jetısu oblysynda 20-dan astam balyq ösıretın şaruaşylyq jūmys ısteidı. Būl şaruaşylyqtar ötken jyly jalpy kölemı 700 tonnadan astam önım şyǧarǧan.
