Timur Qūlybaevtyŋ Halyk qaiyrymdylyq qorynyŋ «Auyl sport – 2025» jobasynyŋ jeŋımpazdary halyqaralyq arenaǧa şyǧyp, el qorjynyna bırden ekı bırdei altyn saldy.
2026 jylǧy 25–29 nauryz aralyǧynda Türkiianyŋ Antaliia öŋırındegı Side qalasynda ötken «Antalya Volleyball Friendship Cup U-16» halyqaralyq jastar turnirınde Qazaqstannyŋ jas sportşylary tarihi jetıstıkke qol jetkızdı.
Būl dodada Jetısu oblysy, Aqsu audany, Jansügırov auylynyŋ qyzdar komandasy men Almaty oblysy, Ile audany, Ötegen batyr auylynyŋ ūldar komandasy Qazaqstan namysyn qorǧady. Auyldan şyqqan qarapaiym balalardyŋ qajyrly eŋbegı, tabandylyǧy men jıgerı olardy ülken jeŋıske jetkızdı.
Halyk qory jarysqa deiıngı daiyndyq kezeŋnı de joǧary deŋgeide ūiymdastyrdy. Qyzdar komandasy Almatydaǧy käsıbi voleibol ortalyǧynda jattyǧyp, tehnikalyq jäne taktikalyq şeberlıgın jetıldırse, ūldar komandasy Balqaş audanynyŋ Baqanas auylynda oqu-jattyǧu jiyndaryn ötkızıp, fizikalyq daiyndyǧyn şyŋdady. Būl daiyndyq olardyŋ är oiynda senımdı, jinaqy jäne jıgerlı öner körsetuıne negız boldy.
«Balalar bız oilaǧannan da jaqsy oinady. Halykqaiyrymdylyq qory bızdıŋ barlyq şyǧyndy - oqu-jattyǧu jiyny, jatyn oryn, tamaqty töledı. Auyl balalaryna būl - ülken mümkındık. Bızdıŋ balalarǧa mūndai täjıribe syilaǧany üşın qorǧa alǧys aitamyz!» - deidı bapker Ǧalym Ǧainol.
Turnir barysynda qazaqstandyq komandalar qarsylastaryn bırınen soŋ bırın aiqyn basymdyqpen jeŋıp, finalǧa joldama aldy. Qyzdar finalda Türkiianyŋ «GAZI» klubymen kezdesıp, 2:0 esebımen senımdı jeŋıske jettı. Al ūldar qūramasy da däl osy qarsylasty 2:1 esebımen ūtyp, chempion atandy.
«Būl – bükıl Qazaqstannyŋ jeŋısı. Auyldan şyqqan jas sportşylarymyz halyqaralyq arenada el namysyn abyroimen qorǧap, kök tuymyzdy biıkke köterdı. Būl jetıstık – olardyŋ tabandylyǧy men eŋbegınıŋ, sondai-aq, auyl jastaryna mümkındık berudıŋ naqty nätijesı. Bız aldaǧy uaqytta da talanttardy qoldap, olardyŋ ülken sporttaǧy jolyn jalǧastyruǧa bar küşımızdı salamyz», – dedı Qordyŋ Atqaruşy direktory Ǧalymbek Jaqsylyqūly.
Jeke şeberlıgımen erekşelengen oiynşylar da nazardan tys qalmady. Qyzdar qūramasynyŋ şabuylşysy Qūralai Bäken turnirdıŋ üzdık oiynşysy atansa, ūldar komandasynan Admir Mahamedjanov däl osyndai märtebege ie boldy. Olardyŋ önerı – bükıl eldıŋ maqtanyşy.
«Jarys öte äserlı ärı qyzyq öttı. Onda är elden kelgen myqty sportşylar boldy. Olardy jeŋu oŋai bolǧan joq, halyqaralyq doda şeberlıktı talap etedı. Mūnda bız özımızdı emes, el namysyn qorǧaudy oiladyq. Jarys künın asyǧa küttık. Daiyndyq barysy qyzu öttı. «Auyl sport» jobasyna daiyndaǧan jatyn orny, tamaq, şeteldegı estelık üşın raqmet. Alǧysymyz şeksız. Būl tek bızdıŋ emes, ata-anamyzdyŋ, bapkerlerımızdıŋ, bükıl auyldyŋ armany», - dedı jeŋımpazdardyŋ bırı Maǧjan Ärıpjanov.
Būl jeŋıs «Auyl sport» jobasynyŋ maŋyzdylyǧyn taǧy bır märte däleldedı. Auyldan şyqqan talanttarǧa mümkındık berılse, olar halyqaralyq deŋgeide de top jaryp, kök tudy kökke kötere alatynyna aiqyn dälel. Qazaqstannyŋ kök bairaǧy Antaliia törınde ekı ret jelbıredı. Būl - el tarihyndaǧy jas sportşylardyŋ jarqyn belesı.
Halyqaralyq turnir turaly ne belgılı?
«Antalya Volleyball Friendship Cup U-16» – jyl saiyn Türkiiada ötetın halyqaralyq jastar turnirı. Turnirge ädette Türkiianyŋ jetekşı klubtarymen qatar, Aziia men Taiau Şyǧys elderınıŋ komandalary qatysady. Qazaqstan komandalary būl turnirde sättı debiut jasap, bırden chempion atanyp, halyqaralyq deŋgeidegı äleuetın aiqyn körsettı.
