Qazaqstan jasóspirimder arasyndaǵy frıstaıldan álem chempıonatynda tarıhı nátıjege qol jetkizdi, dep habarlaıdy "Adyrna" ulttyq portaly Týrızm jáne sport mınıstrligine silteme jasap.
Frıstaıldan jasóspirimder arasyndaǵy álem chempıonatynda Qazaqstan ekinshi oryn aldy.
"Jalpykomandalyq esepte mogýl men akrobatıkadan Qazaqstan quramasy 2 altyn, 2 kúmis júlde ıelenip, Qytaıdan (2 altyn, 3 kúmis, 2 qola) keıin 2-oryn aldy. Úzdik úshtikti Japonııa (2 altyn, 1 qola) sportshylary túıindedi", - dep jazylǵan habarlamada.
Frıstaıl-mogýldan ulttyq qurama barlyq jarys kúni júldege qol jetkizdi. Atap aıtqanda, álem birinshiliginiń alǵashqy kúninde Anastasııa Gorodko jekeleı synda 2-oryn alsa, erteńine parallel mogýlda altynnan alqa taqty.
Al aralas komandalyq saıysta byltyr IV qysqy jasóspirimder Olımpıadasyna qatysqan Iýlııa Fıklıstova men Denıs Rastrýba juby kúmis júldeger atandy.
Frıstaıl-akrobatıkadan jekeleı synda erler arasynda Dinmuhammed Raıymqul kúrdeli baǵdarlamany sátti oryndap, chempıon atandy. Ol 104.52 upaımen eki qytaılyq sportshyny (Iých Iýnhen, Ian Chjıchen) basyp ozdy. Munda áıelder arasynda barlyq júldeni Qytaı akrobattary ıelendi.
Eske sala keteıik, frıstaıl-mogýl jáne frıstaıl-akrobatıkadan jasóspirimder arasyndaǵy álem chempıonaty 2025 jylǵy 7-11 qańtar aralyǵynda Almaty qalasyndaǵy «Shymbulaq» taý-shańǵy kýrortynda ótti. Bul jarysqa 13 elden kelgen 110 sportshy qatysty.
