Júıitkigen poıyzdy basqarap, qanshama halyqty barar jerine aman-saý jetkizip, poıyzdyń ár temirine muqııat bolý temirjolshylardyń mindeti. Bul salada aıanbaı ter tókken adamdardyń eńbegi qaı kezde de eleýsiz qalmaıdy. Qyzyǵynan qıyndyǵy basym salanyń jiligin shaǵyp, maıyn ishken mamandarǵa halyqtyń da alǵysy sheksiz. Sondaı jannyń biri – el yqylasyna bólengen arystyq Omarov Talǵat Ábdisametuly. “Adyrna” ulttyq portalynyń tilshisi temirjolshyny merekemen quttyqtap, mamandyǵynyń qyr-syryn surap aldy.
Talǵat Túrkistan oblysy Arys qalasynyń týmasy. Onyń temir jol salasynda qyzmet etkenine bıyl 38 jyl. Aıtýynsha, eń alǵashqy qyzmetin temirjolda slesar bolýdan bastaǵan.
“10 synypty bitirgennen keıin áskerge bardym. Keıin Depoǵa slesar bolyp jumysqa turdym. Bir jerde tura bermeı, ósýdi qaladym. Sondyqtan teplovoz kómekshisi bolý úshin qysqa merzimdi 2 aılyq kýrstan ótip, jumysqa turdym. 90-shy jyldary mashınıst bolyp oqyp, sol salada qyzmet etýdi bastadym. Qazir poıyz aıdaımyn”,- deıdi ol.
Sol kezden bastap onyń temirjol salasyndaǵy tabysty eńbek joly jalǵasyn tapty. Eńbekqorlyǵymen, tııanaqtylyǵymen kózge tústi. Óz isiniń naǵyz mamanyna aınala bildi.
Halyq - amanat
56 jastaǵy Talǵat poıyz aıdaýdyń qaýip-qateri kóp deıdi. Óıtkeni, halyqty arqalaǵan poıyzdy basqarý ońaıǵa soqpaıdy.
“Únemi jumysqa shyǵarda bir Allaǵa sıynyp shyǵamyn. Óıtkeni, mamandyǵym jaýapkershilikti qajet etedi. Qanshama adamnyń ómiri seniń qolyńda turǵandaı bolady. Sondyqtan únemi saqtyqpen qyzmet etemin. Bir sátte qatelesýge bolmaıdy. Halyq - amanat. Sondyqtan qyzmetke barǵan ár kúnimdi qýanyshqa toltyrǵym keledi. Úıdegi otbasym da alańdap otyrady. Alaıda, jumysymdy jaqsy kórgendikten qyzyǵy men shyjyǵyna shydap kelemin. Mamandyq tańdaǵanda oılanyp tańdaý qajet. Sondyqtan jastarǵa aıtyrym: temirjolǵa kelseńder, unatyp kelińder. Mamandyqtaryńa degen qurmetteriń bolsyn”, - deıdi Talǵat.
Elengen eńbek
Bilikti mamannyń kóp jylǵy eseli eńbegi eleýsiz qalǵan emes. Elge syıly, halqyna qadirli aǵamyz árqashan da qurmet tórinen alasarmaıdy, únemi ujymdastaryna qadirli azamat biliktiligimen elenip júr. Eseli eńbeginiń arqasynda 2015 jyly Asqar Mamınnen “Qozǵalys qaýipsizdigi” úshin marapatqa ıe boldy. Odan bólek, oblys-aýdan ákimderiniń alǵys hattarymen marapattalǵan.
“Osy qyzmetke jetkizip, baǵalap jatqan QTJ-ǵa alǵysym sheksiz! Ekinshi otbasyma aınalǵan temirjoldyń qyzmetkerlerin merekemen quttyqtaımyn. Temirjolda jumys isteý densaýlyqty qajet etedi. Sondyqtan barlyq áriptesterime densaýlyq tileımin!
Aldaǵy ýaqytta elimizde temir jolda kóp jumys bolsa eken. Jastar jumysqa kirip, otbasyny asyraı alsa eken dep tileımin”, dep bolashaq temirjol qyzmetkerlerine tilegin aıtty.
Balalarym temirjolda qyzmet etse dep armandaımyn
Talǵat jubaıymen otbasyly bolǵanyna 32 jyl bolǵan. Qazirde 9 balanyń ákesi. Otbasyn temirjolda júrip asyraǵan ol búginde mamandyǵyn maqtan tutady. Tipti, balalaryna temirjol salasynda qyzmet etýge keńes beredi eken.
“5 qyz, 4 ulym bar. 4 qyzymdy uıasyna ushyryp, 3 ulymdy úılendirdim. Osynyń barlyǵy Temirjoldyń arqasy. Ondaǵy árbir mańdaı terimmen tapqan eńbegimdi otbasyma arnadym. Meniń bir armanym bar. Balalarymnyń biri temirjolda istese eken. Óıtkeni, temirjol - toqtaýsyz qyzmet etetin jumys túri ǵoı”, - dedi ol ishindegisin jasyrmaı.
Búginde bereke daryǵan áýletten taraǵan toǵyz balanyń jeteýi bir-bir úı bolyp, óz salasynda tabysty eńbek etýde. Qazirgi tańda Talǵat Arys qalasynda balalaryna aqylshy áke, nemerelerine qamqor ata bolyp, mamyrajaı turmys keshýde. Eseli eńbektiń óresine shyqqan temirjolshy kóp jylǵy beınetiniń zeınetin kelesi jyly kórmek. Temirjolshyny merekesimen “Adyrna” ujymy shyn júrekten quttyqtap, isine tabys tileıdi!
Dana Nurmuhanbet
“Adyrna” ulttyq portaly
