2025 jyly Qazaqstanda şeteldık qatysuy bar kompaniialar men olardyŋ filialdarynyŋ sany 4,4 myŋǧa artty. Būl ösım negızınen Qytai men Özbekstannan kelgen käsıpkerlerdıŋ belsendılıgımen bailanysty. Mūndai mälımettı Ūlttyq statistika biurosy (ŪSB) jariialady, dep habarlaidy "Adyrna".
ŪSB deregınşe, 2026 jylǧy 1 qaŋtardaǧy jaǧdai boiynşa el aumaǧynda şeteldık qatysuy bar 63,9 myŋ zaŋdy tūlǧa men filial tırkelgen. Būl qatarǧa bırlesken käsıporyndar ǧana emes, sonymen bırge şeteldık kompaniialardyŋ Qazaqstandaǧy filialdary da kıredı.
Qazaqstanda biznes aşqan nemese bırlesken käsıporyn qūrǧan elderdıŋ ışınde ösım körsetkışı boiynşa Qytai men Özbekstan aiqyn köş bastady.
Mäselen, Qytaidyŋ qatysuymen tırkelgen kompaniialar sany 2,8 myŋǧa ösıp, jalpy sany 8 myŋǧa jettı.
Al Özbekstannan kelgen käsıpkerlerdıŋ qatysuymen qūrylǧan kompaniialar 2,5 myŋǧa köbeiıp, olardyŋ jalpy sany 8,2 myŋdy qūrady.
Sonymen qatar Äzerbaijannyŋ qatysuy bar kompaniialar sany 102 ūiymǧa artqan. Qalǧan elder boiynşa ösım 100-den tömen deŋgeide qalyp otyr.
Qazaqstanda şeteldık kompaniialar sany boiynşa bırınşı orynda tūrǧan Resei (jalpy sany 23 myŋ) 2025 jyly kerısınşe, tömendeu körsetken. Bır jyl ışınde Reseimen bailanysty kompaniialar sany 468-ge qysqarǧan.
Sondai-aq Qyrǧyzstan (–313) jäne Türkiia (–209) kompaniialarynyŋ sany da azaiǧany baiqalady.
Qazaqstandaǧy şeteldık qatysuy bar käsıporyndardyŋ basym bölıgı şaǧyn bizneske tiesılı. Resmi esep boiynşa olardyŋ sany 63,4 myŋ.
Al orta käsıporyndar – 359, ırı kompaniialar – 222 ǧana.
Būl körsetkış şeteldık kapitaldyŋ köp bölıgı elge ırı öndırıs türınde emes, negızınen şaǧyn jäne orta biznes baǧytynda kelıp jatqanyn baiqatady.
Qai salada şeteldık biznes köp?
Şeteldık qatysuy bar kompaniialardyŋ eŋ köp bölıgı sauda jäne avtokölık jöndeu salasynda jūmys ısteidı. Būl baǧytta 23,5 myŋ zaŋdy tūlǧa tırkelgen.
Sondai-aq şeteldık biznes jiı kezdesetın salalardyŋ qatarynda:
-
özge qyzmet türlerın körsetu – 10,1 myŋ,
-
qūrylys – 5,9 myŋ,
-
ǧylymi jäne tehnikalyq qyzmet – 4,3 myŋ ūiym.
Aita keteiık, būǧan deiın Ūlttyq statistika biurosy 2026 jylǧy 1 qaŋtarda Qazaqstanda 2,36 mln şaǧyn jäne orta käsıpkerlık subektısı tırkelgenın mälımdegen bolatyn. Būl körsetkış te ösım körsetıp, ötken jylmen salystyrǧanda 100 myŋǧa artqan.
Sarapşylardyŋ pıkırınşe, şeteldık qatysuy bar käsıporyndar sanynyŋ artuy el naryǧyna degen qyzyǧuşylyqtyŋ saqtalǧanyn körsetedı. Alaida keibır elder boiynşa kompaniia sanynyŋ qysqaruy syrtqy ekonomikalyq jaǧdaidyŋ da äserın bıldıruı mümkın.
