AQŞ prezidentı Donald Tramp İranmen sauda qatynasyn jürgızetın barlyq elderge 25 paiyzdyq kedendık baj salyǧyn engızetının mälımdedı, dep habarlaidy "Adyrna" ūlttyq portaly.
Tramp aqparatty Truth Social äleumettık jelısınde jazdy.
«Osy sätten bastap İslam Respublikasymen — İranmen — biznes jürgızetın kez kelgen el AQŞ-pen jasalatyn barlyq kommersiialyq operasiialar üşın 25 paiyzdyq baj salyǧyn töleidı. Būl şeşım tüpkılıktı jäne qaita qarauǧa jatpaidy», — dep jazdy Aq üi basşysy 12 qaŋtarda.
Donald Tramptyŋ aituynşa, būl şara İran ükımetıne qysym körsetu maqsatynda qabyldanǧan. Aq üi basşysy bilıktıŋ el ışındegı narazylyq aksiialaryn küşpen basyp-janşyp otyrǧanyn atap ötıp, būǧan deiın narazylyq bıldıruşılerge kömektesetının mälımdegen bolatyn.
Bloomberg agenttıgınıŋ mälımetınşe, İrannyŋ negızgı sauda serıktesterı qatarynda Ündıstan, Qytai jäne Türkiia bar. Agenttık atap ötkendei, Qytai önımderıne qosymşa 25 paiyzdyq tarif engızu Donald Tramptyŋ ötken jyldyŋ soŋynda QHR töraǧasy Si Szinpinmen jasaǧan sauda «bıtımın» būzuy mümkın.
Al Ortalyq Aziia elderı İranmen sauda-ekonomikalyq bailanystaryn nyǧaityp keledı. 2024 jyly İran men Qazaqstan arasyndaǧy tauar ainalymy 340 mln AQŞ dollaryn qūrady. Qyrǧyzstanmen aradaǧy sauda kölemı 58,5 mln dollar bolsa, Täjıkstanmen – 377,7 mln dollarǧa jetken.
Türıkmenstanmen sauda ainalymy şamamen 600 mln dollardy qūrasa, Özbekstanmen būl körsetkış 500 mln dollarǧa juyqtady.
2025 jyly Ortalyq Aziia memleketterı İranmen aradaǧy tauar ainalymyn jaqyn bolaşaqta 2–3 mlrd AQŞ dollaryna deiın jetkızu jönınde kelısımge kelgen.
Atap aitqanda, mamyr aiynda ötken özbek-iran biznes-forumy qorytyndysy boiynşa ekı eldıŋ käsıpkerlerı jalpy somasy 1 mlrd dollarǧa juyq kelısımderge qol qoidy.
