Qostanai qalasyndaǧy №2 sot jergılıktı tūrǧyn Iýliia Hondy TikTok äleumettık jelısınde qazaqtardy qorlaǧany üşın ekı jylǧa bas bostandyǧynan aiyrdy, dep habarlaidy "Adyrna" ūlttyq portaly Tobolinfo-ǧa sıltep.
Sot ükımımen Qazaqstan azamaty Qylmystyq kodekstıŋ 174-babynyŋ 1-bölıgı («Äleumettık, ūlttyq, rulyq, näsıldık, taptyq nemese dıni arazdyqty qozdyru») boiynşa kınälı dep tanyldy. Ol jazasyn eŋ tömen qauıpsızdık deŋgeiındegı koloniiada öteidı.
Sotta anyqtalǧandai, 2024 jyldyŋ qaraşa aiynyŋ basynda, şamamen 03:45-te, äiel mas küiınde TikTok jelısıne kırıp, öz akkauntynan tıkelei efirge şyqqan. Resei men Ukraina arasyndaǧy qaruly qaqtyǧys taqyryby talqylanǧan efir barysynda ol äŋgımelesuşılerge ūlttyq belgısı boiynşa beiädep ärı qorlaityn sözder aitqan. Sot būl äreketterdı ūlttyq arazdyqty qozdyruǧa baǧyttalǧan dep baǧalady.
Sudia Olga Kuznesova aiyptaluşynyŋ kınäsı tıkelei efirdıŋ jazbasymen, saraptamalyq qorytyndylarmen jäne kuägerlerdıŋ körsetulerımen däleldengenın aitty. Ükım jariialanǧannan keiın Iýliia Hon sot zalynda qamauǧa alyndy. Sondai-aq ol 826 myŋ teŋge kölemınde prosessualdyq şyǧyndardy öteuı tiıs.
Iste jazany jeŋıldetetın män-jailar retınde aiyptaluşynyŋ jol-kölık oqiǧasynan keiın köru qabıletınen aiyrylǧan ūlynyŋ bar ekenı jäne ony emdetuge qarajat jūmsap jürgenı, sondai-aq būryn sottalmaǧany eskerılgen.
Aiyptaluşynyŋ advokaty Valerii Li sot otyrysynda tıkelei efir kezınde onyŋ qorǧauyndaǧy äieldıŋ de qorlanǧanyn, ärı ol bükıl ūltty emes, naqty bır adamdy tıldegenın alǧa tartty. Qorǧau tarapy sot şeşımıne şaǧym tüsıretının mälımdedı.
