قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ قارساڭىندا «جاستار» عىلىمي-زەرتتەۋ ورتالىعى قر اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى كوميتەتىنىڭ قولداۋىمەن ساراپشىلار قوعامداستىعى ءۇشىن «قازاقستان جاستارى – 2021: تاۋەلسىزدىككە – 30 جىل» ۇلتتىق بايانداماسىنىڭ پرەزەنتاتسياسىن ءوتتى.
اقپارات جانە قوعامدىق دامۋ ۆيتسە-ءمينيسترى اسقار ۋماروۆ «جاستاردى قولداۋ ەلىمىزدەگى مەملەكەتتىك ساياساتىنىڭ ستراتەگيالىق باعىتتارىنىڭ ءبىرى سانالادى، سوندىقتان 2021 جىلعى ۇلتتىق باياندامادا قازاقستان رەسپۋبليكاسى تاۋەلسىزدىگىنىڭ 30 جىلى ىشىندەگى جەتىستىكتەر، ءساتتى قادامدار مەن جاستاردىڭ وزەكتى ماسەلەلەرى سياقتى جاستار ساياساتىنىڭ دامۋ ديناميكاسى مەن ۇردىستەرىن تالداۋ ماڭىزدى بولدى. تالداۋ قورىتىندىسى بويىنشا جاستار سالاسىن ودان ءارى جۇيەلى ءارى كەشەندى دامىتۋ بويىنشا مەملەكەتتىك جانە ازاماتتىق سەكتور ءۇشىن ۇسىنىمدار ازىرلەندى» - دەپ ايتىپ ءوتتى.
«جاستار» عىلىمي-زەرتتەۋ ورتالىعىنىڭ ديرەكتورى ايان ساكوشەۆ جاستار ورتاسىنداعى ماڭىزدى وزگەرىستەر مەن اكتۋال ترەندتەرگە نازار اۋداردى. ول دەموگرافيا، دەنساۋلىق، ءبىلىم جانە عىلىم سياقتى جاستار دامۋىنىڭ ماڭىزدى الەۋمەتتىك پارامەترلەرى تۋرالى ەگجەي-تەگجەيلى حاباردار ەتىپ، جاس قازاقستاندىقتىڭ بەينەسىن، تاۋەلسىزدىك ۇرپاعىنىڭ پورترەتىن جانە جاستاردىڭ تاۋەلسىزدىككە دەگەن كوزقاراسىن تانىستىردى.
باياندامانى دايىنداۋ بارىسىندا مەملەكەتتىك ورگانداردىڭ، حالىقارالىق ۇيىمداردىڭ، زەرتتەۋ ينستيتۋتتارىنىڭ اكتۋال ستاتيستيكالىق جانە اناليتيكالىق دەرەكتەرى قولدانىلدى. 2021 جىلى «جاستار» عىلىمي-زەرتتەۋ ورتالىعى جۇرگىزگەن الەۋمەتتانۋ زەرتتەۋلەرىنىڭ ناتيجەلەرى قازاقستاندىق جاستاردىڭ الەۋمەتتىك كوڭىل-كۇيىن تالداۋ كەزىندە بازالىق نەگىزگە اينالدى.
«قازاقستان جاستارى – 2021: تاۋەلسىزدىككە – 30 جىل» ۇلتتىق بايانداماسىن ازىرلەۋگە قاتىسقان اۆتورلار ۇجىمى جاستاردىڭ ەكونوميكالىق مىنەز-قۇلقى، ازاماتتىق جانە ساياسي قاتىسۋى، قۇندىلىق باعىتتارى تۋرالى ايتىپ بەردى. قولدانبالى ەتنوساياسي زەرتتەۋلەر ينستيتۋتى ديرەكتورىنىڭ ورىنباسارى دانا ءاشىمحانوۆا بۇگىنگى تاڭدا قازاقستاندىق جاستاردىڭ ەرەكشەلىگى قۇندىلىق باعدارلارىنىڭ وزىندىك سيمبيوزىندا، اتاپ ايتقاندا ءداستۇرلى جانە زاماناۋي كوزقاراستاردىڭ توعىسۋى مەن قاباتتاسۋىندا ەكەنىن اتاپ ءوتتى. بۇل رەتتە قازاقستاندىق جاستارعا جوعارى موبيلدىك، ديدجيتالدانۋ، تسيفرلاندىرۋ سياقتى الەمدىك ترەندتەر ءتان.
«ادىرنا» ۇلتتىق پورتالى.
