تۇرىك ليراسى ءالى دە قۇلدىراپ جاتىر، ول جۇمادا تاعى 2,5 پايىزعا ارزاندادى. ساۋدا دەرەكتەرى ورتالىق بانك مەجەنى تومەندەتكەننەن كەيىن 1 دوللارعا 16 ليرادان كەلەتىنىن كورسەتتى ، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
بەيسەنبىدە تۇركيانىڭ ورتالىق بانكى ەسەپ مولشەرلەمەسىن 15 پايىزدان 14 پايىزعا دەيىن تومەندەتۋ تۋرالى شەشىم قابىلدادى.
تۇرىك ۆاليۋتاسى ءبىر دوللار ءۇشىن 16,12 ليرا بولدى، بۇرىن ءبىر دوللار ءۇشىن 15,66 ليراعا جەتكەن ەدى.
قاڭتاردا ءبىر دوللار ءۇشىن 7,4 ليرا باعامىنا ساتىلعان تۇرىك ۆاليۋتاسى ءبىر جىل ىشىندە قۇنىنىڭ جارتىسىنان كوبىن جوعالتتى. كەيىنگى 20 جىلدا بىر تاۋلىك ىشىندەگى ەڭ كوپ قۇلدىراۋ دەرەگى 23 قاراشادا تىركەلدى، سودان كەيىن ليرا 16 پايىزعا تومەندەدى.
بۇل جايت 18 قاراشادا تۇركيانىڭ ورتالىق بانكى ەسەپ مولشەرلەمەسىن 16-دان 15 پايىزعا دەيىن تومەندەتۋ تۋرالى شەشىم قابىلداعان سوڭ بولدى، سودان كەيىن ەل پرەزيدەنتى تايىپ ەردوعان وسى جاعداي ينفلياتسيانىڭ تومەندەۋىنە اكەلەتىنىن مالىمدەپ، مەجە تومەندەۋى دۇرىس دەپ ساناعان ەدى.
“ادىرنا” ۇلتتىق پورتالى
