«سيبۋ قىزىلوردا» جۇمىسشىلارى ۆاحتاعا شىعۋ ءۇشىن 5 مىڭنان 40 مىڭعا دەيىن اقشا بەرگەندەرىن ايتادى
جۇمىس جاساۋ ءۇشىن دە پارا بەرۋ كەرەك ەكەن. وندا سىياقىنىڭ ءتۇرى «پارت» دەپ اتالادى. بۇل تۋرالى Ratel.kz تىلشىسىنە «سيبۋ قىزىلوردا» قازاقستان-قىتاي ينجەنەرلىك بۇرعىلاۋ كومپانياسىنىڭ جۇمىسشىلارى ايتىپ بەردى.
جۇمىسشىلار 2016-2017 جىلدار ارالىعىندا كومپانيانىڭ كادرلار ءبولىمىنىڭ باسشىسى ءاليا ەگەمبەرگەنوۆا جۇمىس جاساۋعا كەدەرگى جاساپ كەلگەنىن ايتادى. 15 كۇندىك ۆاحتاعا ءتۇسۋ ءۇشىن اقشا بوپسالاپتى.5 مىڭنان باستاپ 40 مىڭ تەڭگەگە دەيىن تالاپ ەتكەن. سونداي-اق ەڭبەك دەمالىسىنا بەرىلەتىن اقشانى دەر كەزىندە الۋ بەرۋ ءۇشىن دە «پارت» سۇرايدى ەكەن.
«2016 جىلىدىڭ قىركۇيەك ايىنىڭ 2-ءشى جۇلدىزى كۇنى ءسابيت جۇنىسبەكوۆ اباي داڭعىلىندا ورنالاسقان مەكەمەنىڭ باس كەڭسەسىنە بارىپ جۇمىسقا جىبەرۋىن سۇراعان كەزدە، كادرلار ءبولىمىنىڭ باسشىسى ەگەمبەرگەنوۆا ءاليا «بارعىڭ كەلسە جولىن جاساپ جىبەر» - دەپ تالاپ ەتتى»، - دەپ جازعان ءبىر توپ جۇمىسشى قىزىلوردا وبلىسى اكىمى قىرىمبەك كوشەرباەۆتىڭ اتىنا. بۇل ارىز قىزىلوردا قالالىق ءىىب-نىڭ باسشىسى پوليتسيا پودپولكوۆنيگى داۋلەت بەركىمباەۆ پەن وبلىس پروكۋرورى حاليدۋللا داۋەشوۆقا دا جولدانعان.
- بىزدەن اقشا بوپسالاعان كادر ءبولىمىنىڭ باسشىسىنىڭ ۇستىنەن ارىز جازعانبىز. ونىڭ ۇستىنەن قىلمىستىق ءىس قوزعالدى دەگەن بولاتىن. بىراق ول ايەل جۇمىستا ءجۇر. ۇجىمدىق ارىزعا قول قويعانداردى جۇمىستان شىعارامىز دەپ قورقىتىپ جاتىر. جاقىندا عانا مىرزاحان التاەۆ دەگەن كراناۆششيك جىگىتتى الداپ-سۋلاپ ءوز ەركىمەن جۇمىستان شىعۋ تۋرالى ارىز جازدىرىپ الدى. ءبىز قاراپايىم جۇمىسشىلارمىز. ەڭبەكاقىمىز ايدان ايعا ارەڭ جەتەدى. ونسىزدا كۆارتال سايىن بەرىلەتىن جانە ەڭبەككە سىيلىقاقى قىسقارىپ قالدى. بۇرىن جۇمىس جوق كەزدە كومپانيا ايلىقتىڭ 50 پايىزىن تولەيتىن. قازىر ول جوق, - دەيدى «سيبۋ قىزىلوردا» كومپانياسىنىڭ جۇمىسشىسى ءسابيت جۇنىسبەكوۆ.
7-8 جىلدان بەرى اتالعان مەكەمەدە جۇمىس جاساپ كەلە جاتقان ءسابيت جاقسى جۇمىس ىستەگەن ءۇشىن بەرىلەتىن بونۋستاردىڭ دا الىنعانىن ايتىپ وتىر. قازاق-قىتاي كومپانياسىندا قازاقتار مەن قىتايلار اراسىندا تەپە تەڭدىكتىڭ جوقتىعىنا دا كۇيىنەدى. وسى ايدا جۇمىسشىلار جەرگىلىكتى بيلىك وكىلدەرى مەن قۇزىرلى ورگاندارعا شاعىم جازعان سوڭ ايلىقتارى 10 پايىزعا ءوسىپتى.
- ءيا، جۋىردا عانا ايلىعىمىزدى كوبەيتتى. بىراق ايتۋعا ۇيالاسىڭ. 2890 تەڭگە قوسىلدى. بىزدە كوبىنە شيەلى اۋدانىنىڭ جىگىتتەرى جۇمىس ىستەيدى. وسىلار ۇيىمداستىردى دەپ بىزگە جالا جاۋىپ وتىر.ماسەلەن،كەشە مەنى ۆاحتاعا جىبەرمەي قويدى. ارىزعا قول قويعانداردىڭ بارلىعىن قىسىپ جاتىر, - دەيدى تاعى ءبىر جۇمىسشى سۇيىندىك قۇلماحانوۆ.
«سيبۋ قىزىلوردا» قازاقستان-قىتاي ينجەنەرلىك بۇرعىلاۋ كومپانياسىنىڭ جۇمىسشىلارى 2017 جىلدىڭ 24 جەلتوقسانىندا «نۇر وتان» پارتياسىنىڭ قوعامدىق قابىلداۋىندا بولىپ، وسى پروبلەمالاردى ايتقان. ال 2018 جىلدىڭ 8-قاڭتارىندا «نۇر وتان» پارتياسىنىڭ وبلىستىق فيليالىندا وسىعان قاتىستى جيىن وتكەن. وعان وبلىس اكىمىنىڭ ورىنباسارى، ىشكى ساياسات باسقارماسىنىڭ باستىعى، قۇزىرلى ورگان وكىلدەرى، «سيبۋ قىزىلوردا» باسشىلىعى مەن جۇمىسشىلاردا قاتىسقان.
- بۇل ارىزعا قاتىستى پارتيا قىزمەتكەرلەرى تەكسەرۋ جۇمىستارىن جۇرگىزگەن. پارتيانىڭ كەڭەسىندە بارلىق تاراپ وكىلدەرى بولىپ، ارىز قارالدى.تاپسىرمالار بەرىلىپ،كومپانياعا ەسكەرتۋلەر دە جاسالدى. كومپانياعا جۇمىسشىلاردى تەك جۇمىسپەن قامتۋ ورتالىعى ارقىلى الۋ تۋرالى مىندەتتەمە جۇكتەلگەن.جۇمىسشىلاردىڭ الەۋمەتتىك جاعدايى مەن ەڭبەكتە قۇقىقتارىنىڭ قورعالۋى دا ايتىلعان. «سيبۋ قىزىلوردا» قىزمەتكەرلەرىنىڭ الەۋمەتتىك-تۇرمىستىق جاعدايىن دۇرىستاۋعا اۋدە ەتكەن,- دەيدى «نۇر وتان» پارتياسى قىزىلوردا وبلىستىق فيليالى توراعاسىنىڭ ورىنباسارى ەرجان بايتىلەس.
قازاق-قىتاي كومپانياسىنداعى داۋ الەۋمەتتىك جەلىدە دە قىزۋ تالقىلانىپ جاتىر. شىمكەنتتىك زاڭگەر ايگۇل ورىنبەك «كوشەرباەۆ مىرزا، ماسەلەنى شەشۋدىڭ ورنىنا، جىگىتتەردى سىندىرۋعا كوشتىڭىز بە؟» دەگەن پوست جازىپتى. زاڭگەر جازباسىندا ءبىر اي بۇرىن وزىنە جۇمىسشىلاردىڭ حابارلاسقانىن ايتادى. ماسەلەنى ۋشىقتارماي شەشۋگە تىرىسىپ، ءتيىستى ورگاندارعا حابارلادىم دەيدى. الايدا، شاعىمدانۋشىلاردان ءجايسىز حابار العانىن باياندايدى.
ايگۇل əپكە ءبىزدى بىرتىندەپ سىندىرىپ جاتىر سىزگە شىققانىمىز ءۇشىن"- دەپ تۇر. ويتكەنى جەرگىلىكتى تەلەارنالار تۇسىرگەن بىراق كورسەتپەگەن. قىتايلىقتار كۇندىگىنە 4000 مىڭ تەڭگەگە تاماق جەسە، ءبىز 900 تەڭگەگە جەيمىز. ءبىزدىڭ ىستەيتىن جۇمىسىمىز ولاردان اۋىر، بىراق كادر ءبولىمىنىڭ باسشىسى Əليا ءبىزدى əرقاشان قىتايلىقتاردىڭ استىنا جىعىپ بەرەدى" - دەپ كۇيىنىپ وتىر.
بۇگىن قىزىلوردا وبلىسىنىڭ وڭىرلىك كوممۋنيكاتسيالار قىزمەتىندە وسى ماسەلەگە قاتىستى ارنايى بريفينگ ءوتتى. وعان: وبلىستىق ەڭبەك سالاسىنداعى باقىلاۋ باسقارماسى باسشىسىنىڭ ورىنباسارى تۇمار شالاباەۆا، ءوىىد باستىعىنىڭ ورىنباسارى نۇرلان انارباەۆ، "سيبۋ قىزىلوردا" ينجەنەرلىك بۇرعىلاۋ كومپانياسى" جشس باسشىسى ۆان دوسيا قاتىستى.
ەڭبەك ينسپەتسياسىنىڭ مالىمەتىنشە 46-جۇمىسشىدان شاعىم تۇسكەن. ولار اتالعان كومپانياداعى كادر ءبولىمىنىڭ باسشىسى ءاليا ەگەمبەرگەنوۆانىڭ ۇستىنەن ارىزدانىپ، كاسىپورىندا ۆاحتا كەستەسىنىڭ بەكىتىلمەيتىنىن ايتقان. قازىر جۇمىسشىلار ارىزىنا قاتىستى بارلىق شارالار جاسالاپ جاتىر ەكەن.
- بۇگىنگى كۇنى الاياقتىق جانە زاڭسىز سىياقى الۋ بويىنشا ەكى بىردەي قىلمىستىق ءىس قوزعادىق. قازىر تەرگەۋ ارەكەتتەرى ءجۇرىپ جاتىر. الەۋمەتتىك جەلىدە ءتۇرلى جازبالار شىعىپ جاتىر. ەشقانداي قىسىم جاسالىپ جاتقان جوق. تەرگەۋ كەزدەرىندە ونداي بولمادى.بىزگە بۇل جونىندە بىردە ءبىر ارىز تۇسكەن جوق.تاعى دا ەشقانداي دا قىسىمنىڭ جاسالىپ جاتپاعاندىعىن ايتقىم كەلەدى,- دەدى ىشكى ىستەر باسقارماسىنىڭ وكىلى نۇرلان انارباەۆ.
بۇل «سيبۋ قىزىلوردا» كومپانياسى توڭىرەگىندەگى ءبىرىنشى داۋ ەمەس. قازاقستان-قىتاي ينجەنەرللىك بۇرعىلاۋ مەكەمەسى 1,3 ملرد تەڭگە سالىق تولەۋدەن جالتارعان. وسى ءۇشىن 2011-2014 جىلدارى ءۇش قازاقستاندىق پەن ەكى قحر-نىڭ ازاماتى ءىستى بولدى. ولار مەملەكەت بيۋدجەتىنە قارىزدارىن وتەگەسىن قالالىق №2 سوتى قىلمىستىق جاۋاپكەرشىلىكتەن بوساتقان ەدى.
فوتو اۆتوردىكى جانە الەۋمەتتىك جەلىدەن الىندى.
