«اق جول» دەموكراتيالىق پارتياسى قازاقستان تاۋەلسىزدىگىنىڭ 30 جىلدىعىنا وراي «ءار قازاق مەنىڭ – جالعىزىم» اتتى ءداستۇرلى فوتوبايقاۋىن جاريالاعان بولاتىن.
بايقاۋدىڭ نەگىزگى ماقساتى – پورترەتتىك، تاقىرىپتىق جانە وزگە دە جانرلار ارقىلى تاۋەلسىز قازاقستاننىڭ قالىپتاسۋىنا ۇلەس قوسقان قازاقستاندىقتاردىڭ بەينەسىن اشۋ، الاش ۇستانىمىن ناسيحاتتاۋ.
جۇمىستارعا داۋىس بەرۋ «اق جول» پارتياسىنىڭ رەسمي سايتىندا 25 قازاننان – 25 قاراشاعا دەيىن جۇرگىزىلگەن بولاتىن. بيىلعى بايقاۋعا بارلىعى 120 اۆتوردان 600-گە جۋىق جۇمىس كەلىپ تۇسكەن. داۋىس بەرۋ ناتيجەسى بويىنشا ەڭ كوپ داۋىس جيناعان 40 جۇمىس پەن تاقىرىپقا ساي 12 جۇمىس ىرىكتەلىپ، كوميسسيا قاراۋىنا جىبەرىلدى. كوميسسيا قۇرامىندا ايگىلى فوتوجۋرناليست، «فوتوونەر» قوعامدىق بىرلەستىگىنىڭ توراعاسى اسىلحان ءابدىرايىموۆ، بەلگىلى جۋرناليست قاينار ولجاي سەكىلدى بىرقاتار تانىمال تۇلعالار قازىلىق جاسادى.
جۇلدەگەرلەردى سالتاناتتى ماراپاتتاۋ ءراسىمىن العىسوزىمەن اشقان «اق جول» دەموكراتيالىق پارتياسىنىڭ توراعاسى ازات پەرۋاشەۆ بارلىق قاتىسۋشىلاردى 1-جەلتوقسان – تۇڭعىش پرەزيدەنت كۇنىمەن قۇتتىقتاپ، ساتتىلىك تىلەدى.
- «اق جول» پارتياسى ءداستۇرلى تۇردە ۇيىمداستىرىپ جۇرگەن «ءار قازاق مەنىڭ – جالعىزىم» فوتوبايقاۋى جىلدان جىلعا تانىمالدىلىعى ارتىپ، فوتوونەر الەمىندەگى ايتۋلى شاراعا اينالىپ كەلەدى. جالپى، بۇل كونكۋرسقا ءوز سالاسىنىڭ مامانى سانالاتىن كاسىبي فوتوسۋرەتشىلەرمەن قاتار، جاس اۋەسقوي فوتوونەرشىلەر دە قاتىسىپ جاتىر. الداعى ۋاقىتتا بۇل كونكۋرستا اۋەسقوي فوتوسۋرەتشىلەرگە ارناپ جاڭا نوميناتسيا اشۋدى ۇسىنامىن، – دەدى ازات تۇرلىبەكۇلى.
ال، ادىلقازىلار القاسىنىڭ توراعاسى اسىلحان ءابدىرايىموۆتىڭ ايتۋىنشا، بيىل قازاق فوتوونەرىنە 180 جىل تولىپ وتىر.
- العاش رەت 1841 جىلدىڭ 6 جەلتوقسانىندا جاڭگىر حان بوكەي ورداسىندا العاش فوتوكورمە ۇيىمداستىرعان بولاتىن. ياعني، بيىل قازاق فوتوونەرىنە 180 جىل تولىپ وتىر. بيىلعى بايقاۋ جوعارى دەڭگەيدە ءوتتى. قاتىسۋشىلار جۇمىستارى تاقىرىپتىق جاعىنان، ساپا جاعىنان بارلىق تالاپتارعا جاۋاپ بەرەدى، – دەدى ا. ءابدىرايىموۆ.
جالپى، ادىلقازى القاسىنىڭ توراعاسى اسىلحان ءابدىرايىموۆتىڭ ايتۋىنشا، باس جۇلدەسى 1 000 000 تەڭگە قۇراعان «ءار قازاق مەنىڭ – جالعىزىم» اتتى ءداستۇرلى فوتوبايقاۋى قازاقستانداعى قارجىلىق سىياقىسى ەڭ جوعارى فوتوبايقاۋ بولىپ تابىلادى.
قازىلار القاسىنىڭ مۇشەسى قاينار ولجاي كەنجەلەپ قالعان قازاق فوتوونەرىن ناسيحاتتاپ، قولداۋدا ۇلكەن ەڭبەك اتقارىپ وتىرعان «اق جول» پارتياسىنا العىسىن جەتكىزدى.
- قازاق فوتوونەرى سوڭعى جىلدارى كەنجەلەپ، وگەي بالانىڭ كۇيىن كەشىپ كەلدى. فوتوونەر قازاق تاريحىنان سىر شەرتەتىن، تالاي اقتاڭداق جىلداردى بەينەلەپ قالعان ۇلكەن ونەر سالاسى. وسىعان دەيىن فوتوونەر ماسەلەنى ەشبىر قوعامدىق ۇيىم، ەشبىر پارتيا كوڭىل بولمەي كەلگەن ەدى. «اق جول» پارتياسى وسى يدەيانى نازارعا الىپ، ءداستۇرلى فوتوبايقاۋ ۇيىمداستىرىپ جۇرگەنى وتە قۋانتارلىق جاعداي. كونكۋرسقا قاتىسۋشىلاردىڭ جۇمىستارى قازاقستاننىڭ بۇكىل گەوگرافياسىن قامتىعان. قازاقستاننىڭ تاۋەلسىزدىگىنە ەڭبەگى سىڭگەن ساڭلاق تۇلعالاردان باستاپ، قاراپايىم اۋىل تۇرعىندارىنىڭ ءومىرىن اشاتىن سۋرەتتەر بار. «اق جول» پارتياسى الاش ۇستانىمىن ناسيحاتتاپ جۇرگەنى امبەگە ايان، بيىلعى كونكۋرسقا سول الاش تاقىرىبىن ارقاۋ ەتكەن فوتوسۋرەتتەر دە كوپتەپ كەلگەنىن اتاپ ءوتۋ كەرەك. قازىلار القاسى اۆتورلار سۋرەتتەرىن ەڭ الدىمەن داۋىس بەرۋ ناتيجەسى، سونىمەن قاتار، فوتولاردىڭ ساپاسى، تاقىرىپتى اشا ءبىلۋى سەكىلدى كريتەريلەرمەن باعالاندى، – دەدى ق. ولجاي ءوز سوزىندە.
سالتاناتتى ماراپاتتاۋ راسىمىنە «اق جول» فراكتسياسىنىڭ دەپۋتاتتارى، باق وكىلدەرى قاتىستى. جۇلدەگەرلەر مەن لاۋرەاتتار ەستەلىك گراموتالارمەن جانە اقشالاي سىيلىقتارمەن ماراپاتتالدى.
«ءار قازاق مەنىڭ – جالعىزىم» ءداستۇرلى فوتوبايقاۋىنىڭ جۇلدەگەرلەرى:
"ادىرنا" ۇلتتىق پورتالى
