شىمكەنت قالاسىنداعى قوناەۆ داڭعىلى جالعاسى قۇرىلىسىنىڭ 3-كەزەڭى تەرەشكوۆا كوشەسىنەن بوگەت كەشەسىنە دەيىنگى ارالىقتا ءجۇرىپ جاتىر. قالا اكىمى قۇرىلىس نىساندارىن ارالاۋ بارىسىندا مۇندا دا ات باسىن بۇردى.
اتالعان كوشە بويىنشا ورتاشا جوندەۋ جۇمىستارى 2020 جىلدىڭ قازان ايىندا باستالعان. شىمكەنت قالاسىنىڭ ماڭىزدى كوشەسى سانالاتىن بۇل داڭعىلدىڭ قۇرىلىس جۇمىستارى «كازاحدورستروي» جشس-نە جۇكتەلگەن.
كەزەڭنىڭ جالپى ۇزىندىعى 6 جولاقتى 0,561 شاقىرىمدى قۇرايدى. ال جولدىڭ ەنى 42 مەتر. بۇگىنگى تاڭدا 700 م ەكى باعىتتى اينالما تەمىر جولىن، 948 م كارىز قۇبىرىن سالۋ، 3,4 شق. كابەل جەلىلەرى، 24 تەمىر جول ەلەكتر باعانالارىن جانە 2 دانا جەر استى جاياۋ جۇرگىنشىلەر وتكەلدەرىن ورناتۋ، تەمىر جول وتكەلىنىڭ 24 دانا سۆاي قۇيۋ، 60000م3 جەر جۇمىستارى جانە 4 دانا تەمىر جول كوپىرىنىڭ نەگىزىن قۇيۋ جانە 4 دانا تەمىرجول بالكالارىن ورناتۋ جۇمىستارى ورىندالدى.
قازىرگى ۋاقىتتا تىرەۋ قابىرعالارىن قۇيۋ، ينجەنەرلىك جەلىلەردىڭ ورنىن اۋىستىرۋ، مەملەكەت مۇقتاجىنا الىنعان ۇيلەردى ءسۇرۋ جۇمىستارى جۇرگىزىلىپ جاتىر.
قالا اكىمى ماڭىزدى قۇرىلىس نىساندارىن تۇرعىندارعا دۇرىس تۇسىندىرە وتىرىپ، ەكى جاقتى كەلەسىممەن ۇيلەردى مۇقتاجدىققا الۋ كەرەكتىگىن ايتتى.
