شىمكەنتتەگى پروۆيزورلى ورىندار مەن كۇندىزگى ستاتسيونارلاردا ەم الۋشىلار قاتارى 77%-عا ازايدى. بۇل تۋرالى اقپاراتتىق-كوممۋنيكاتسيالىق ورتالىعىندا وتكەن بريفينگتە قالا اكىمىنىڭ ءبىرىنشى ورىنباسارى شىڭعىس مۇقان ءمالىم ەتتى، دەپ حابارلايدى قازاقپارات ءتىلشىسى.
شىڭعىس مۇقاننىڭ سوزىنشە، قالادا ەپيدەميولوگيالىق جاعداي قالىپقا تۇسە باستاعان. «كەشە ءبىر كۇندە 437 ناۋقاس كوروناۆيرۋستان جازىلدى. ال، جەدەل جاردەم قىزمەتىن شاقىرتۋ وتكەن ايلاردا 2320-عا دەيىن جەتسە، بۇگىندە ول 1200 شاقىرىلىمعا ازايدى. بۇل – بىلتىرعى جىلمەن سالىستىرعاندا 100 شاقىرتۋ عانا كوپ دەگەن ءسوز. قوسىمشا ايتا كەتسەم، جۇقپالى اۋرۋلارعا بايلانىستى پروۆيزورلى ورىندار مەن كۇندىزگى ستاتسيونارلاردا ەم الۋشىلار 77%-عا ازايدى. دەگەنمەن ءاردايىم احۋالدى باقىلاۋدا ۇستاۋ – ءبىزدىڭ باستى ماقسات. بۇل تۇرعىدا جۇيەلى جوسپارلارىمىز بار. قازىرگى قالىپتى نورمادا 1420 توسەك-ورىندىق 10 پروۆيزورلى ستوتسيونار جانە 2 ينفەكتسيالىق اۋرۋحانا جۇمىس ىستەۋدە. ەگەر ناۋقاستار سانى كوبەيسە «ب» نۇسقاسىنا، ال احۋال تىم ۋشىقسا «س» نۇسقاسىنا كوشەمىز»، – دەدى شىڭعىس جۇمابەكۇلى.
