شىمكەنتتە «بوزارىق» قوسالقى ەلەكترستانتسياسى ىسكە قوسىلدى

2294
Adyrna.kz Telegram

شىمكەنت قالاسىنىڭ سولتۇستىك بولىگىن ساپالى ەلەكتر قۋاتىمەن قامتيتىن «بوزارىق» قوسالقى ستانتسياسى ىسكە قوسىلدى. ناتيجەسىندە قۋاتى 160 مەگاۆاتتى قۇرايتىن پودستانتسيا ميلليوننان استام تۇرعىنى بار شاھاردىڭ 250 مىڭعا جۋىق حالقىن ساپالى جارىقپەن قامتيدى. اتالعان جوباننىڭ جالپى قۇنى -7,9 ملرد تەڭگەنى قۇرايدى.

شىمكەنت قالاسىنىڭ باس جوسپارىنا ەنگىزىلگەن ماڭىزدى جوبا، ياعني 6 جىلدان بەرى جىر بوپ كەلە جاتقان «بوزارىق» قوسالقى ستانتسياسىنىڭ قۇرىلىس جۇمىستارى اياقتالدى.

ميلليوننان استام تۇرعىنى بار شاھاردىڭ سولتۇستىك بولىگىندەگى 10 شاعىن اۋدانىندا ەلەكتر قۋاتىنىڭ تاپشىلىعى بار ەدى. وسى ماسەلەنى شەشۋ باعىتىندا 2015 جىلى قۋاتى 160 مەگاۆاتتى قۇرايتىن «بوزارىق» پودستانتسياسىنىڭ قۇرىلىسى باستالعان بولاتىن.

الايدا، ميلليونداعان قارجى بولىنگەن پودستانتسيانىڭ قۇرىلىسى ورتا جولعا كەلگەندە توقتاپ قالعان. ناتيجەسىندە 2017 جىلى مەردىگەر مەكەمە «شىمكەنتحيممونتاج» جشس-ءى وزىنە جۇكتەلگەن مىندەتتەمەلەردى ورىنداماۋىنا بايلانىستى اراداعى تۇزىلگەن كەلىسىمشارتى بۇزىلىپ، «اۆرورا ەكونستراكشن» جشس ارقىلى قۇرىلىس جۇمىستارى جالعاسىن تاپتى.

سونداي-اق، شىمكەنت قالاسىنىڭ ەنەرگەتيكا جانە ينفراقۇرىلىمدى دامىتۋ باسقارماسىنىڭ باسشىسى بورانباي بۋلاتبەكوۆتىڭ ايتۋىنشا قازىرگى تاڭدا قالانى ساپالى ەلەكتر جارىعىمەن قامتاماسىز ەتۋ ماقساتىندا تاعى 5 قوسالقى ستانتسيانىڭ قۇرىلىسى قاتار جۇرگىزىلۋدە.

بورانباي بۋلاتبەكوۆ، ەنەرگەتيكا جانە ينفراقۇرىلىمدى دامىتۋ باسقارماسىنىڭ باسشىسى: «2017 جىلى ءبىرىنشى مەردىگەر مەكەمە اياعىنا دەيىن ىستەمەي، سوسىن 2017 جىلدان مىنە بۇگىن تاپسىرىپ وتىرمىز. بۇل قوسالقى ستانتسياعا بەس ۇلكەن ستانتسيالار قوسىلادى. ولار «ءنۇرسات»، «استانا-1»، «استانا-2»، «1-م-1»، «ىنتىماق» قوسالقى ستانتسيالارىنىڭ قوسىلۋ كوزى بولىپ تابىلادى».

سالتاناتتى جيىنعا قالا اكىمى مۇرات ايتەنوۆ قاتىسىپ، قوسالقى ستانتسيا جۇمىسىن قوسىپ بەردى.

ايتا كەتەيىك، «بوزارىق» قوسالقى ستانتسياسى ساپالى ەلەكتر قۋاتىمەن قامتۋ ناتيجەسىندە قالانىڭ سولتۇستىك بولىگىندە ورنالاسقان اسار-2, تۇران، ىنتىماق-2, سولتۇستىك ساياجاي، باتىس، بوزارىق، قايناربۇلاق، شىمكەنت سيتي مەن دوستىق، ءنۇرسات شاعىناۋداندارىنداعى جارىق ماسەلەسىنىڭ تاپشىلىعى شەشىلەدى.

پىكىرلەر