17 قاراشا - حالىقارالىق ستۋدەنتتەر كۇنى اياسىندا قازاقستان ينجەنەرلىك-تەحنولوگيالىق ۋنيۆەرسيتەتىندە «قىزىققا تولى ستۋدەنتتىك ءومىر!» اتتى مەرەكەلىك ءىس- شارا ءوتتى. بۇل شارانى ستۋدەنتتەر ءۇشىن ۇستازدارى، وقىتۋشى-پروفەسسورلار قاۋىمى ازىرلەدى. مەرەكەلىك باعدارلاما بارىسىندا كافەدرا مەڭگەرۋشىلەرى، وقىتۋشى – پروفەسسورلار ستۋدەنتتەردى قۇتتىقتاپ، قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گ.ءا.سارسەنبەكوۆانىڭ اتىنان قازيتۋ-دىڭ قوعامدىق – مادەني ومىرىنە بەلسەندى ارالاسىپ، جاستار ساياساتىنا وزىندىك ۇلەسىن قوسىپ جۇرگەن ستۋدەنتتەر ماراپاتتالدى.
قازيتۋ ۇجىمى ستۋدەنتتەرگە كەرەمەت توسىن سىي ۇسىندى. ارنايى حالىقارالىق ستۋدەنتتەر كۇنىنە وراي ازىرلەنگەن 100 كيلوگراممدىق «Whoopie pie » تورتى مەرەكەنىڭ اجارىن اشتى. ءدامدى تورتتى دايىنداۋدا تەك ساپالى ونىمدەر قولدانىلدى. تورت 4 قاباتتان قۇرالىپ، ءتۇرلى جەمىس - جيدەكتەرمەن بەزەندىرىلدى. ستۋدەنتتەرگە ۋنيۆەرسيتەت اسحاناسىندا داستارحان جايىلىپ، بارلىعى تورتتان ءدام تاتتى.
ستۋدەنتتەر كۇنى ۇستازدار دايىنداعان مەرەكەلىك كونتسەرتكە ۇلاستى. بۇل كەشتىڭ اشىلۋ سالتاناتىندا قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا قۇتتىقتاۋ ءسوز ايتىپ، ستۋدەنتتەرگە ستۋدەنتتىك بيلەت تاپسىردى.
قازيتۋ كوللەدجى الەۋمەتتىك پاندەر كافەدراسىنىڭ وقىتۋشىسى دينارا جانبىروۆنا ن.تىلەنديەۆتىڭ «القيسسا» كۇيىن تارتىپ، دەنە شىنىقتىرۋ ءپانىنىڭ وقىتۋشىسى شولپان راقىمجان «اپپاق گۇلدەر» ءانىن ورىندادى. وقىتۋشىلار قۇرامى دايىنداعان فلەشموب ءبيى ۇسىنىلىپ، ۋنيۆەرسيتەتتىڭ كافەدرا مەڭگەرۋشىلەرى "مەكەنىم قازاقستان!" انىمەن كونتسەرتتىك باعدارلامانى اياقتادى.
مەرەكە سوڭىندا ستۋدەنتتەر ۇيىندە تالىمگەرلەر، ستۋدەنتتەر مەن اتا-انالار اشىق الاڭدا مەرەكەلىك كەزدەسۋ وتكىزدى. تالىمگەرلەر توبى مەرەكەلىك داستارحان باسىندا ستۋدەنتتەرمەن سۇحباتتاسىپ، فوتوسەسسيا جۇرگىزىپ، اتا-انالارىمەن بايلانىسقا شىقتى.
