مەملەكەت باسشىسى نۇرسۇلتان نازارباەۆ ماۋلەن اشىمباەۆتىڭ تاعايىندالۋىنا قاتىستى پىكىر ءبىلدىردى، - دەپ حابارلايدى اقوردا.
ەلباسى "نۇر وتان" پارتياسى توراعاسىنىڭ جاڭا ءبىرىنشى ورىنباسارى ماۋلەن اشىمباەۆتى تانىستىرىپ، مۇحتار قۇل-مۇحاممەدكە اتقارعان جۇمىسى ءۇشىن العىس ايتتى. "مۇحتار قۇل-مۇحاممەد قازاقستان رەسپۋبليكاسى پارلامەنتى سەناتىنىڭ دەپۋتاتى بولىپ تاعايىندالۋىنا بايلانىستى پارتيا توراعاسىنىڭ ءبىرىنشى ورىنباسارى لاۋازىمىنان بوساتىلادى. وسى جاۋاپتى قىزمەتتەگى ۇلەسىڭىز بەن سىڭىرگەن ەڭبەگىڭىز ءۇشىن العىس بىلدىرەمىن. وسىعان وراي پارتيا توراعاسىنىڭ ءبىرىنشى ورىنباسارى لاۋازىمىنا ماۋلەن اشىمباەۆتى تاعايىنداۋ تۋرالى شەشىم قابىلداندى. ول بەس جىلدان استام پارلامەنت ماجىلىسىنىڭ دەپۋتاتى بولىپ، كوميتەت باسقاردى. مەن ونىڭ پارتيا مارتەبەسى مەن ءرولىن ارتتىرۋعا ۇلكەن ۇلەس قوساتىنىنا سەنىمدىمىن. جۇمىستارىڭىزعا ساتتىلىك تىلەيمىن", - دەدى نۇرسۇلتان نازارباەۆ.
ەلباسى "نۇر وتان" پارتياسىنىڭ الدىندا تۇرعان قازىرگى مىندەتتەرگە ەرەكشە نازار اۋداردى.
"نۇر وتان" پارتياسى مەملەكەت ساياساتىن ايقىندايتىن ماڭىزدى ساياسي كۇشكە اينالدى. پارتيا بارلىق باعدارلامالارىمىزدى ىسكە اسىرۋعا اتسالىسىپ كەلەدى", - دەدى قازاقستان پرەزيدەنتى.
مەملەكەت باسشىسى بارلىق مەملەكەتتىك جانە سالالىق باعدارلامالاردىڭ ساپالى جۇرگىزىلىپ، ولاردىڭ ىسكە اسىرىلۋىنا باقىلاۋدى كۇشەيتۋدىڭ ماڭىزدى ەكەنىن اتاپ ءوتتى. نۇرسۇلتان نازارباەۆ ۇلتتىق ەكونوميكانى ءتورتىنشى ونەركاسىپتىك رەۆوليۋتسيا جاعدايىنا بەيىمدەۋ قاجەتتىگىن ايتتى.
"ەگەر ءبىز الەمدىك دامۋدان قالىپ قويمايمىز دەسەك، وندا العا ۇمتىلۋىمىز قاجەت. سول سەبەپتى بيىلعى جولداۋ وسى رەفورمالاردى ورىنداۋعا باعىتتالعان. بۇعان دەيىنگى بارلىق باعدارلامالارىمىز وسىعان ارنالعان بولاتىن. ماسەلە ولاردىڭ قالاي جۇمىس ىستەۋىندە. ءبىز ەكسپورتتىق ءونىم شىعاراتىن كاسىپورىندار قۇرۋىمىز قاجەت", - دەدى قازاقستان پرەزيدەنتى.
نۇرسۇلتان نازارباەۆ "نۇرلى جول" ينفراقۇرىلىمدىق دامۋ باعدارلاماسىن ىسكە اسىرۋدىڭ وزەكتىلىگىن اتاپ ءوتتى. سوڭىندا ەلباسى مەملەكەتتىك باعدارلامالاردى ازىرلەۋ جانە ىسكە اسىرۋ ىسىندەگى پارتيانىڭ بەلسەندىلىگىن ارتتىرۋدىڭ ماڭىزدىلىعىنا نازار اۋداردى. "وبلىستاردا پارتيا ۇيىمدارى بار. ولار بەلگىلەنگەن مىندەتتەردى ىسكە اسىرۋدا بەلسەندى بولۋعا ءتيىس", - دەدى قازاقستان پرەزيدەنتى.
tengrinews.kz
