قازاقستان ەۋروپا كەڭەسىنە مۇشە بولا الا ما؟

2628
Adyrna.kz Telegram

بۇل ساۋالعا سەناتور مۇرات باقتيارۇلى جاۋاپ بەردى. ول قر سىرتقى ىستەر مينيسترلىگى ەۋروپا كەڭەسىنە مۇشە ەلدەرمەن حالىقارالىق ۇيىمعا كىرۋ بويىنشا كەلىسسوزدەر جۇرگىزىپ جاتقانىن ايتتى دەپ حابارلايدى "ادىرنا" ۇلتتىق پورتالى "Orda.kz-كە " سىلتەمە جاساپ.

– ەۋروپانىڭ اتى – ەۋروپا. مەن دەپۋتات رەتىندە قازاقستاننىڭ بۇل كەڭەسكە مۇشە بولۋىن قولدايمىن. بىراق ول ءۇشىن كەيبىر جايتتاردى شەشىپ العان دۇرىس.  بىرىنشىدەن، زاڭ تۇرعىسىنان، ال ەكىنشىدەن، ەۋروپا تاراپىنان بىرقاتار كەدەرگىلەر بار. ءبىز بارلىعىمەن ءبىر مامىلەگە كەلۋىمىز كەرەك", - دەدى مۇرات باقتيارۇلى.

سەناتور ەۋروپا كەڭەسىنە كىرۋ  "قازىردەن باستالعانىن" ايتىپ، بۇل جۇمىستى پارلامەنت ەمەس، سىرتقى ىستەر مينيسترلىگى جۇرگىزىپ جاتقانىن ءتۇسىندىردى. مۇرات باقتيارۋلانىڭ بولجامى بويىنشا، كەلىسسوزدەر 3-5 جىلعا سوزىلۋى مۇمكىن.

ايتا كەتۋ كەرەك، ەۋروپا كەڭەسى – وعان مۇشە مەملەكەتتەر مەن ەۋروپا ەلدەرى اراسىنداعى قۇقىقتىق ستاندارتتار، ادام قۇقىقتارى، دەموكراتيالىق دامۋ، زاڭدىلىق جانە مادەني ءوزارا ءىس-قيمىل سالاسىنداعى ىنتىماقتاستىققا جاردەمدەسەتىن حالىقارالىق ۇيىم.

ەۋروپا كەڭەسىنىڭ ەڭ ماڭىزدى جەتىستىكتەرىنىڭ ءبىرى — ادام قۇقىقتارى مەن نەگىزگى بوستاندىقتارىن قورعاۋ تۋرالى ەۋروپالىق كونۆەنتسيانىڭ ازىرلەنۋى جانە قابىلدانۋى.

 

"ادىرنا" ۇلتتىق پورتالى

پىكىرلەر