اقتوبە وبلىسىنىڭ اكىمى وڭداسىن ءورازاليننىڭ توراعالىعىمەن وتكەن جيىندا وبلىس اكىمىنىڭ اتاۋلى ستيپەندياسى تابىستالدى دەپ حابارلايدى "ادىرنا" ۇلتتىق پورتالى.
شاراعا وبلىس اكىمىنىڭ ورىنباسارى بۇلبۇل ەلەۋسىنوۆا، باسقارما باسشىلارى، جوعارى جانە ارناۋلى وقۋ وقۋ ورىندارىنىڭ رەكتورلارى، ستيپەنديا يەگەرلەرى قاتىستى.
كەزدەسۋ بارىسىندا و.ورازالين ەلىمىزدە قازىرگى تاڭدا جاستارعا جاسالىپ جاتقان جان-جاقتى قولداۋلارعا توقتالىپ، وقۋ ورىندارىنىڭ 10 وكىلىنە اتاۋلى ستيپەندياسىن تابىس ەتتى.
"مەملەكەت باسشىسى اتاپ وتكەندەي، جاس ۇرپاقتى قولداۋ وتە ماڭىزدى. ويتكەنى، مەملەكەتتىڭ دامۋى مەن بولاشاعى تىكەلەي وسىعان بايلانىستى. بۇگىن وڭىرىمىزدەگى جوعارى جانە ارناۋلى ورتا وقۋ ورىندارىنىڭ ۇزدىك جانە بەلسەندى ستۋدەنتتەرىمەن كەزدەسىپ، اتاۋلى ستيپەنديانى تابىستادىم. جالپى اتاۋلى ستيپەنديا ىنتالاندىرۋ ماقساتىندا سوڭعى ءۇش جىلدان بەرى وقۋ ۇلگەرىمى جوعارى جانە وبلىستىڭ قوعامدىق جۇمىستارىنا ەتەنە ارالاسىپ جۇرگەن 2-3 كۋرس ستۋدەنتتەرىنە تاعايىندالىپ كەلەدى. جاۋاپتى سالا باسشىلارىنا بۇل يگى ءىستى جۇيەلى تۇردە جۇرگىزىپ وتىرۋدى تاپسىردىم", - دەپ اتاپ ءوتتى وبلىس اكىمى.
اتاپ وتەيىك، وبلىس اكىمىنىڭ ستيپەندياسى 2017 جىلدان بەرى بەرىلىپ كەلە جاتىر. وسى جىلدار ارالىعىندا جوعارى وقۋ ورىندارىنىڭ 1074, كاسىپتىك-تەحنيكالىق ءبىلىم بەرۋ ۇيىمدارىنىڭ 300 ستۋدەنتىنە اتاۋلى ستيپەنديا تاعايىندالدى. بيىلعى جىلى ستيپەنديا وقۋ ۇلگەرىمىندە وڭ كورسەتكىشى بار، قوعامدىق ومىرگە بەلسەنە قاتىساتىن تالانتتى جانە دارىندى، سونىڭ ىشىندە الەۋمەتتىك وسال توپتاعى 175 ادامعا تاعايىندالدى. جوعارى وقۋ ورىندارىنىڭ 145 ستۋدەنتىنە 160,0 مىڭ تەڭگە كولەمىندە جانە كاسىبي-تەحنيكالىق ءبىلىم بەرۋ مەكەمەلەرىنىڭ 30 ستۋدەنتىنە 80,0 مىڭ تەڭگە كولەمىندە بەرىلەدى.
شارا سوڭىندا بەلسەندى جاستار وزدەرىنە قولداۋ كورسەتىپ كەلە جاتقان ايماق باسشىسىنا ءوز العىستارىن ءبىلدىرىپ، وبلىس اكىمىمەن بىرگە ەستەلىك سۋرەتكە ءتۇستى.
"ادىرنا" ۇلتتىق پورتالى.
