2021 جىلعى 8 قازاندا №603 «ارقالىق - نۇر-سۇلتان» باعىتىنداعى جولاۋشىلار پويىزى ارقالىق ستانتسياسىنان جونەلتىلگەننەن كەيىن ەر ادام پويىز بريگاداسىنىڭ قىزمەتكەرلەرىنە زايىبىنىڭ تولعاعى كەلىپ قالعانىن ايتقان، دەپ حابارلايدى «ادىرنا» ءتىلشىسى «قازاقستان تەمىر جولى» ۇق» اق ءباسپاسوز قىزمەتىنە سىلتەمە جاساپ.
تورەحان ءابدىرايىموۆ باستاعان پويىز بريگاداسى قىزمەتتىك نۇسقاۋلىققا سايكەس ارەكەتكە كوشىپ، كەلەسى ستانتسياعا جەدەل جاردەم شاقىرىلدى. تەمىر جولدا 8 جىلدان استام ۋاقىت جۇمىس ىستەيتىن، ونىڭ ىشىندە 3 جىلدان بەرى پويىز باستىعى ت.ءابدىرايىموۆ مۇنداي جاعدايمەن ءبىرىنشى رەت بەتپە-بەت كەلىپ وتىر ەكەن. دارىگەرلەر كەلگەنگە دەيىن تەمىرجولشىلار ايەلدى بوسانۋعا دايىنداي باستادى. جولسەرىكتەر يرينا اندرەەۆا مەن جاڭىل باتالوۆا جولاۋشىلار اراسىنان تابىلعان دارىگەرلەر سۆەتلانا اياپوۆا (زەينەتتەگى اكۋشەر-گينەكولوگ) جانە گاۋحار قويشىعۇلوۆانىڭ (ەمدەۋ ۇيىمىنىڭ باسشىسى) نۇسقاۋىمەن ارەكەت جاسادى. جۇكتى ايەلدى امان-ەسەن بوساندىرۋ ءۇشىن ۆاگوندا بارلىق قاجەتتى جاعدايلار جاسالدى جانە ءبىراز ۋاقىتتان دۇنيەگە قىز بالا كەلدى.
پويىز دەرجاۆينسك بەكەتىنە جەتكەننەن كەيىن جاس انا نۇرايلىم قۇرمانالى مەن ونىڭ شاقالاعىن جولسەرىكتەر جەدەل جاردەم قىزمەتكەرلەرىنە تاپسىردى.
«ادىرنا» ۇلتتىق پورتالى
