ەكى التىن، ءبىر كۇمىس، ەكى قولا جەڭىپ العان كيكبوكسشىلاردى اتىراۋلىقتار حالىقارالىق اۋەجايدان زور قۇرمەتپەن كۇتىپ الدى.
بۋداپەشت تورىندە التىن مەدال يەلەنگەن ازامات وتەمىسوۆ 67 كەلى سالماقتا ونەر كورسەتتى. الەم كۋبوگىن ەكىنشى مارتە جەڭىپ العان ازامات وتەمىسوۆ ۆەنگريادا قارسىلاستارىن ايقىن باسىمدىقپەن تىزە بۇكتىردى.
«جارىس وڭاي بولعان جوق. قارسىلاستارىم جوعارى دەڭگەيدە دايىندىقپەن كەلگەن. ولاردىڭ كاسىبي دەڭگەيلەرى قاي ايقاستا دا بايقالىپ تۇردى. ءبىز ۆەنگريا تورىندە ەلىمىزدىڭ كوك تۋىن جەلبىرەتۋ ءۇشىن بار كۇشىمىزدى سالدىق. جەڭىسىمىزدى تاۋەلسىزدىگىمىزدىڭ 30 جىلدىعىنا ارنايمىز» دەيدى الەم كۋبوگىنىڭ التىن مەدال يەگەرى ازامات وتەمىسوۆ.
51 كەلى سالماقتا ونەر كورسەتىپ، التىن مەدالدى جەڭىپ العان اتىراۋلىق سپورتشىنىڭ ءبىرى نۇرسۇلتان جۇماباەۆ. قازاقستاننىڭ نامىسىن ابىرويمەن قورعاعان رومان زۋبارەۆ (51 كەلى) كۇمىس جۇلدەگە يە بولدى. قولا جۇلدەنى ءجانالى سالىمگەرەي (57 كەلى) مەن سەرىكجان سالىمگەرەەۆ (67 كەلى) جەڭىپ الدى.
ەسكە سالا كەتەلىك، ۆەنگريا استاناسى بۋداپەشت قالاسىندا وتكەن كيكبوكسينگتەن 26-شى الەم كۋبوگىنا 45 ەلدەن 3000-نان استام سپورتشى قاتىستى.
