بۇگىن قوستانايدا ءبىلىم بەرۋ سالاسىنداعى ماڭىزدى سالتاناتتى ءىس-شارا ءوتتى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ جازدى، دەپ حابارلايدى «ادىرنا» ءتىلشىسى.
«مۇعالىمدەردىڭ كاسىبي مەرەكەسى قارساڭىندا «ۇزدىك پەداگوگ – 2021» رەسپۋبليكالىق بايقاۋىنىڭ قورىتىندىسى شىعارىلدى.
بيىل ونىنشى رەت ءوتىپ جاتقان مەرەيتويلىق ءراسىم قازاقستان تاۋەلسىزدىگىنىڭ 30 جىلدىعى قارساڭىندا ۇيىمداستىرىلىپ، اسا كورنەكتى اعارتۋشى، پەداگوگ ىبىراي ءالتىنساريننىڭ 180 جىلدىعىمەن تۇسپا-تۇس كەلدى. وسىعان بايلانىستى ءبىز ءىس-شارانى ۇلى اعارتۋشىنىڭ تۋعان جەرىندە وتكىزەمىز دەپ شەشىم قابىلدادىق.
2020 جىلدىڭ قاڭتارىندا مەملەكەت باسشىسى قاسىم-جومارت كەمەلۇلى توقاەۆ «پەداگوگ مارتەبەسى تۋرالى» زاڭعا قول قويدى. پرەزيدەنتتىڭ قولداۋىنىڭ ارقاسىندا جانە وسى زاڭنىڭ قابىلدانۋىنىڭ ناتيجەسىندە ءبىز مۇعالىمدەردىڭ جالاقىسىن ارتتىرىپ، پەداگوگتەردى وزىنە ءتان ەمەس فۋنكتسيالاردان بوساتۋ بويىنشا جۇمىس جۇرگىزدىك»،– دەپ جازدى ول.
بۇگىن ەلىمىزدىڭ تۇكپىر-تۇكپىرىنەن كەلگەن 64 مۇعالىم «ۇزدىك پەداگوگ-2021» اتاعىنا يە بولدى. پەداگوگتەردىڭ ارقايسىسى 1000 اەك كولەمىندە سەرتيفيكاتپەن جانە «ۇزدىك پەداگوگ» توسبەلگىسىمەن ماراپاتتالدى. سونىمەن قاتار اقشالاي سىياقىلار جەرگىلىكتى اتقارۋشى ورگاندار تاراپىنان دا بەكىتىلدى. بۇل كۇنى 10 پەداگوگ «ەڭبەك ارداگەرى» مەدالىمەن جانە «ى. التىنسارين»، «ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرىمەن ماراپاتتالدى. پەداگوگيكا سالاسىنىڭ ەڭبەك ارداگەرلەرىنە دە قۇرمەت كورسەتىلدى.
«ادىرنا» ۇلتتىق پورتالى
