اقش، ۇلىبريتانيا، شۆەيتساريا جانە جاپونيا دارىگەرلەرى الەمدە بالالار تىنىس جولدارىن زاقىمدايتىن بەلگىسىز رەسپيراتورلىق-سينتسيتيالدى ۆيرۋستى جۇقتىرا باستاعانىن مالىمدەدى دەپ حابارلايدى "ادىرنا" ۇلتتىق پورتالى "ۆۆس News" سايتىنا سىلتەمە جاساپ.
اقش-تاعى نيۋ-يورك اۋرۋحانالارىنىڭ بىرىندەگى بالالاردىڭ جۇقپالى اۋرۋلار ءبولىمىنىڭ مەڭگەرۋشىسى رابيا اگانىڭ ايتۋىنشا، سابيلەر مەن بالالاردىڭ جاڭا ۆيرۋستى جۇقتىرۋ وقيعالارى ءساۋىر ايىندا باستالىپ، سونىڭ سالدارىنان رەانيماتسيا بولىمشەلەرى بىردەن تولىپ كەتكەن.
عالىمداردىڭ مالىمدەۋىنشە، كوروناۆيرۋس پاندەمياسى RSV تارالۋىنا اسەر ەتكەن جانە كارانتيندىك شارالاردىڭ ارقاسىندا بالالاردا ۆيرۋسقا قارسى يممۋنيتەت قالىپتاسپاعان. اۋرۋدىڭ ءورشۋى كوروناۆيرۋستان ساقتاندىرۋ بويىنشا شارالار السىرەگەننەن كەيىن پايدا بولعان.
اقش اۋرۋلاردى باقىلاۋ جانە الدىن الۋ ورتالىقتارىنىڭ مالىمەتى بويىنشا، بالالاردىڭ كوپشىلىگىندە ۆيرۋس جوتەل مەن مۇرىننان كىرگەن سۋىق سەكىلدى جەڭىل وتەدى. بىراق كەيبىر جاعدايلاردا بۇل برونحيتكە، وكپەنىڭ تومەنگى بولىگىنىڭ قابىنۋىنا اكەلۋى مۇمكىن.
بۇعان دەيىن اقش اۋرۋلاردى باقىلاۋ جانە الدىن الۋ ورتالىقتارىنىڭ ماماندارى كوروناۆيرۋستىڭ "دەلتا" نۇسقاسى باسىم بولعالى بەرى ەلدە COVID-19 بەلگىلەرى بار بالالاردى اۋرۋحاناعا جاتقىزۋ سانى كۇرت وسكەنىن حابارلاعان بولاتىن. الايدا جاڭا زەرتتەۋلەردىڭ ناتيجەلەرى، جاڭا شتامم قاۋىپتى جانە اۋرۋدىڭ اۋىر ءتۇرىن تۋدىرادى دەگەن قورقىنىشتىڭ نەگىزسىز ەكەنىن كورسەتەدى.
"ادىرنا" ۇلتتىق پورتالى.
