وبلىس اكىمى ماحامبەت دوسمۇحامبەتوۆ توراعالىق ەتكەن پلەنارلىق سەسسياعا قر ءبىلىم جانە عىلىم مينيسترلىگىنىڭ وكىلدەرى، اۋدان اكىمدەرى مەن 20 مىڭعا جۋىق پەداگوگ ونلاين تۇردە قاتىستى.
جاڭا وقۋ جىلىنا ارنالعان كەلەلى كەڭەستە وتكەن جىل قورىتىندىلانىپ، الداعى ماقسات-مىندەت ايقىندالدى. ايماق باسشىسى ءبىلىم سالاسىندا اتقارىلعان اۋقىمدى جوبالاردىڭ ناتيجەلى بولعانىن اتاپ ءوتتى.
- ءبىلىم بەرۋ سالاسى ءار كەز باستى نازاردا. وڭىردە ماڭىزدى جوبالار جۇزەگە اسىرىلۋدا. ماسەلەن، «اتىراۋ وبلىسىندا ءبىلىم بەرۋدى دامىتۋدىڭ 2021-2023 جىلدارعا ارنالعان جول كارتاسى» باعدارلاماسىن وقۋشىلاردىڭ بولاشاعىنا سالىنعان ينۆەستيتسيا دەۋگە بولادى. پاندەميا قيىندىقتارىنا قاراماستان، اتىراۋدىڭ ءاربىر ۇستازى ءوز مىندەتىن جوعارى دارەجەدە ورىندايتىنىنا سەنىمدىمىن – دەدى وبلىس اكىمى ماحامبەت دوسمۇحامبەتوۆ.
قر ءبىلىم جانە عىلىم مينيسترلىگىنىڭ وكىلى گۇلزات كوبەنوۆا ورتا ءبىلىم بەرۋدەگى جاڭاشىلدىقتار مەن كاسىپتىك ءبىلىم بەرۋ جۇيەسىندەگى وزگەرىستەرگە توقتالدى.
- ورتا ءبىلىم بەرۋ ۇيىمدارىندا ەرەكشە ءبىلىم الۋدى قاجەت ەتەتىن بالالاردىڭ قامقورلىعى باستى نازارعا الىنادى. «ينكليۋزيۆتى ءبىلىم بەرۋ ماسەلەلەرى بويىنشا» زاڭ شەڭبەرىندە 50 مىڭ بالاعا پسيحولوگيالىق-مەديتسينالىق پەداگوگيكالىق كەڭەس بەرۋ جۇيەلى تۇردە جۇرگىزىلەدى. بۇدان بولەك، مەملەكەتتىك تاپسىرىس ورنالاستىرۋ نورماسى زاڭعا ەنگىزىلدى. وقۋشىلاردىڭ سپورتپەن اينالىسۋعا جاعداي جاسالۋى نازاردان تىس قالمايدى. ال، 2024 جىلدان باستاپ 12 جىلدىق وقىتۋعا كەزەڭ-كەزەڭمەن كوشۋ كوزدەلىپ وتىر. سونىمەن قاتار، بيىلدان باستاپ كاسىپتىك وقۋ ورىندارىنا اكادەميالىق دەربەستىك بەرىلىپ وتىر – دەدى گۇلزات كوبەنوۆا.
وبلىستىق ءبىلىم بەرۋ باسقارماسىنىڭ باسشىسى ساتقان ەسەنعاليەۆتىڭ ايتۋىنشا، وتكەن وقۋ جىلى وڭ ناتيجەلەرمەن قورىتىندىلانعان. الايدا، ءتۇيىنى تارقالماعان ماسەلەلەر دە جوق ەمەس.
- وبلىستا ءۇش اۋسىمدىق ءبىلىم بەرۋ پروبلەماسى ءالى دە وزەكتى. وسىعان وراي الداعى 5 جىلدىڭ ىشىندە 37 مەكتەپتىڭ قۇرىلىسىن جۇرگىزۋ جوسپاردا. بۇل پروبلەما كەزەڭ-كەزەڭىمەن شەشىلەدى دەپ كۇتىلۋدە. سونداي-اق، قازاق ءتىلدى مەكتەپتەر ءۇشىن ورىس ءتىلدى مۇعالىمدەردىڭ جەتىسپەۋشىلىگى ءالى دە بايقالادى. وسى پروبلەمانى شەشۋ ماقساتىندا جىل سايىن ارنايى گرانتتار ءبولىپ، جوعارى وقۋ ورىندارىمەن بايلانىسىپ وتىرمىز – دەدى سپيكەر ساتقان ەسەنعاليەۆ.
جاڭا وقۋ جىلىنىڭ تاعى ءبىر جاڭالىعى، جەرگىلىكتى ۇستازدار شىعارماشىلىق مۇمكىندىكتەر سىيلايتىن ءتول باسىلىممەن قاۋىشادى.
اتالعان كونفەرەنتسيادا وبلىستىق ءبىلىم بەرۋ باسقارماسىنىڭ ادىستەمەلىك ورتالىعى دايىنداعان «ءادىسTime» جۋرنالىنىڭ تۇساۋى كەسىلدى.
ءىس-شارا سوڭىندا، جەتىستىكتەر بيىگىندە كورىنگەن ءبىر توپ ۇستازدار قر ءبىلىم جانە عىلىم مينيسترلىگىنىڭ «ءبىلىم بەرۋ ءىسىنىڭ قۇرمەتتى قىزمەتكەرى»، «ەڭبەك ارداگەرى» جانە «ى.التىنسارين» اتىنداعى توسبەلگىلەرىمەن ماراپاتتالدى.
