ءبىلىم جانە عىلىم ءمينيسترى اسحات ايماعامبەتوۆ مەكتەپ ديرەكتورلارىن تاعايىنداۋدىڭ جاڭا ءتارتىبىن ايتتى، دەپ حابارلايدى «ادىرنا» ءتىلشىسى.
«بىرىنشىدەن، ەندى مەكتەپ ديرەكتورىنىڭ مىندەتىن اتقارۋشىسى بولىپ ءۇش ايدان اسپايتىن جانە ءبىر رەتتەن ارتىق ەمەس مەرزىمدە عانا ىستەۋگە بولادى. وسى كەزەڭدە كونكۋرس وتكىزىلىپ، جاڭا باسشى تاعايىندالۋى كەرەك.
ەرەجەدە بەلگىلەنگەندەي، مەكتەپ ديرەكتورىنىڭ بوس نەمەسە ۋاقىتشا بوس لاۋازىمىنا كونكۋرس تۋرالى حابارلاندىرۋ بوس ورىن پايدا بولعاننان كەيىن جەتى جۇمىس كۇنى ىشىندە ءبىلىم باسقارماسىنىڭ رەسمي سايتىندا جانە اككاۋنتىندا ورنالاستىرىلۋى كەرەك.
وسىلايشا، بوس نەمەسە ۋاقىتشا بوس ديرەكتور لاۋازىمىنا كونكۋرس جاريالاماي اق، جىلدار بويى ديرەكتوردىڭ مىندەتىن اتقارۋشىسى بولىپ جۇمىس ىستەپ جۇرە بەرۋگە ەندى جول بەرىلمەيدى.
ايتپاقشى، بۇگىنگى تاڭدا ەلىمىزدە مەكتەپ باسشىسى لاۋازىمىنا 700-دەن استام بوس جۇمىس ورنى بار جانە سايكەسىنشە ول جەرلەردە ديرەكتوردىڭ مىندەتىن اتقارۋشى ادامدار جۇمىس ىستەپ ءجۇر.
ەكىنشىدەن، ەرەجەدە ديرەكتوردىڭ ۋاقىتشا بوس لاۋازىمىنا (بالا كۇتىمىنە بايلانىستى دەمالىس، وقۋ جانە ت.ب.) تاعايىنداۋ رەگلامەنتتەلەتىن بولادى. مۇنداي جاعدايلاردا دا ۇيىم باسشىسى تىكەلەي تاعايىنداۋ ەمەس، كونكۋرس ارقىلى انىقتالاتىن بولادى.
ۇشىنشىدەن، ەندى ديرەكتور لاۋازىمىنا كونكۋرستى اۋداندىق ءبىلىم بولىمدەرى ەمەس، وبلىستىق ءبىلىم باسقارمالارى وتكىزەتىن بولادى. ياعني، كونكۋرستىق راسىمدەردى ۇيىمداستىرادى جانە ديرەكتورلاردى انىقتايدى. سودان كەيىن ديرەكتوردىڭ كانديداتۋراسى بويىنشا قۇجاتتار ەڭبەك شارتىن جاساسۋ ءۇشىن ءبىلىم بولىمىنە جىبەرىلەدى. 5 جىلعا تاعايىندالادى»،– دەدى مينيستر.
ايماعامبەتوۆ بايقاۋدىڭ ءوزى بىرنەشە كەزەڭنەن تۇراتىنىن اتاپ ءوتتى:
- كانديداتتاردىڭ ديرەكتور لاۋازىمىنا قۇجاتتاردى تاپسىرۋى;
- ءبىلىم باسقارماسىنداعى كادر قىزمەتىنىڭ كانديداتتىڭ بىلىكتىلىك تالاپتارىنا سايكەستىگىن باعالاۋى، كونكۋرسقا قاتىسۋعا رۇقسات بەرۋى;
- ۇمىتكەرلەرگە ارنالعان ەلەكتروندىق تەستىلەۋ (باسقارۋشىلىق قۇزىرەتتەر، پەداگوگيكا، پسيحولوگيا، قر زاڭناماسى بويىنشا تەستىلەۋ);
- وقۋ ورنىنىڭ قامقورشىلىق كەڭەسىنىڭ الدىندا مەكتەپتىڭ دامۋ جوسپارىن قورعاۋ (تەستىلەۋدى ءساتتى تاپسىرعان جاعدايدا);
- ءبىلىم باسقارماسىنداعى اڭگىمەلەسۋ (قامقورشىلىق كەڭەسىنىڭ الدىندا مەكتەپتىڭ دامۋ جوسپارىن ءساتتى قورعاپ شىققان ۇمىتكەرلەر جىبەرىلەدى).
«قامقورشىلىق كەڭەستەرىنىڭ قۇرامىنا اتا-انالار، پەداگوگيكا سالاسىنىڭ ەڭبەك ارداگەرلەرى، قوعام قايراتكەرلەرى، ۇكىمەتتىك ەمەس ۇيىمداردىڭ وكىلدەرى كىرەدى.
بارلىق كەزەڭنەن وتكەن ۇمىتكەرمەن ءبىلىم ءبولىمى ءتيىستى ەڭبەك شارتىن جاساپ، ونى ديرەكتور ەتىپ تاعايىنداۋ تۋرالى بۇيرىق شىعارادى.
كانديداتتاردى قامقورشىلىق كەڭەسىمەن كەلىسۋ بويىنشا كوپتەگەن پىكىرتالاس بولدى.
ءبىز مۇنى دا ەسكەردىك. ەندى قامقورشىلىق كەڭەسى ديرەكتور لاۋازىمىنا كەمىندە ەكى كانديدات بويىنشا كەلىسىم بەرۋى ءتيىس. ەگەر كانديداتتاردىڭ سانى بۇدان از بولسا، وندا كونكۋرس وتكىزىلمەگەن بولىپ ەسەپتەلەدى جانە قايتا جاريالانادى.ەگەر قامقورشىلىق كەڭەسى ەكى مارتە ەكى كانديداتتان از ادام تاڭداعان جاعدايدا جانە سايكەسىنشە كونكۋرس ەكى رەت وتكىزىلمەگەن بولسا، وندا كونكۋرسقا قاتىسىپ جاتقان بارلىق كانديدات كەلەسى كەزەڭگە وتەدى.
قامقورشىلىق كەڭەستىڭ جۇمىسى مەن قۇرۋ ەرەجەسىن دە قايتا قاراۋدامىز.قاعيدادا بولاشاق ديرەكتورلارعا قويىلاتىن بىلىكتىلىك تالاپتارىنا كوپ كوڭىل بولىنەدى. مۇندا بىرنەشە ەرەكشەلىك بار.
بىرىنشىدەن، بولاشاق ديرەكتورلار مىندەتتى تۇردە مەنەدجمەنت كۋرستارىنان ءوتىپ، ءتيىستى سەرتيفيكاتتارى بولۋى كەرەك.
ەكىنشىدەن، ديرەكتور لاۋازىمىنا باسشى رەتىندە جۇمىس ءوتىلى بار كاسىبي مۇعالىمدەر تاعايىندالۋى مۇمكىن، ال جالپى پەداگوگيكالىق جۇمىس ءوتىلى كەمىندە 5 جىل بولۋى قاجەت.
ۇشىنشىدەن، ۇمىتكەر تاعايىندالعانعا دەيىن سوڭعى ەكى جىل ءبىلىم بەرۋ سالاسىندا جۇمىس ىستەۋى ءتيىس.
بۇل تارماق بۇرىن-سوڭدى قاجەتتى جۇمىس تاجىريبەسى مەن پەداگوگيكالىق ەڭبەك ءوتىلى بار، بىراق سوڭعى جىلدارى ءبىلىم بەرۋ سالاسىندا جۇمىس ىستەمەگەن ادامدار مەكتەپ ديرەكتورى لاۋازىمىنا تاعايىندالعان تاجىريبەنىڭ بولۋىنا بايلانىستى ەنگىزىلىپ وتىر. 20 جىل بۇرىن مۇعالىم بولىپ جۇمىس ىستەگەن نەمەسە ءتىپتى مەكتەپ ديرەكتورى بولعان، دەگەنمەن ءبىلىم بەرۋ سالاسىنداعى جاڭاشىلدىقتار مەن ورىن العان وزگەرىستەر تۋرالى حابارى جوق، اۋىل اكىمدىكتەرىنىڭ نەمەسە وزگە دە مەملەكەتتىك ورگانداردىڭ قىزمەتكەرلەرى مەكتەپ ديرەكتورى بولىپ تاعايىندالاتىن.
تورتىنشىدەن، تاعى ءبىر جاڭاشىلدىق — كادر رەزەرۆىن قۇرۋ. العاشقى ەكى كەزەڭنەن (تەستىلەۋ جانە قامقورشىلىق كەڭەسپەن كەلىسۋ) ءساتتى وتكەن، بىراق ءبىلىم باسقارماسىندا اڭگىمەلەسۋدەن وتپەگەن كانديداتتار ەندى ءبىر جىلعا رەزەرۆكە الىنۋى مۇمكىن. بۇل كانديداتتارعا مەكتەپتىڭ قامقورشىلىق كەڭەسىمەن كەلىسە وتىرىپ، ءبىر جىل ىشىندە ديرەكتور لاۋازىمىنا تاعايىندالۋ قۇقىعىن بەرەدى.
بەسىنشىدەن، بيىلدان باستاپ ديرەكتورلاردى روتاتسيالاۋ ينستيتۋتى ەنگىزىلەتىن بولادى. سوڭعى بىرنەشە ايدا ءبىز ەرەجەلەردى ازىرلەپ، ساراپشىلارمەن تالقىلاپ جاتىرمىز.
ديرەكتورلاردى تاعايىنداۋ راسىمدەرى مەن ولاردى ماتەريالدىق قولداۋ جونىندەگى وسى وزگەرىستىڭ بارلىعى ديرەكتور لاۋازىمىنا لايىقتى، بارىنشا دايارلانعان كانديداتتاردى تاڭداۋعا جانە ءبىلىم بەرۋ ۇيىمدارى باسشىلارىنىڭ باسەكەگە قابىلەتتىلىگىن ارتتىرۋعا باعىتتالعان.
سايىپ كەلگەندە بۇل ءبىلىم بەرۋ ساپاسىنا اسەر ەتەدى»،– دەپ ءسوزىن تولىقتىردى ول.
«ادىرنا» ۇلتتىق پورتالى
