استانادا ۆاكتسيناعا قارسى ءبىر توپ ايەلدەر دەنساۋلىق ساقتاۋ مينيسترلىگىنىڭ وكىلدەرىنە شابۋىلدادى، دەپ حابارلايدى “ادىرنا” ۇلتتىق پورتالى Stan.kz اقپارات اگەنتتىگىنە سىلتەمە جاساپ.
تۇرعىندارمەن كەزدەسۋگە دەنساۋلىق ساقتاۋ ۆيتسە-مينيسترلەرى جاندوس بۇركىتباەۆ، اجار عينيات جانە قازاقستاننىڭ باس سانيتار دارىگەرىنىڭ رەسمي وكىلى ەرجان بايتاناەۆ كەلگەن. الايدا ايەلدەر ولاردىڭ ءسوزىن تىڭداماي، شەنەۋنىكتەرگە جۇدىرىق الا جونەلگەن.
ءوز كەزەگىندە ەرجان بايتاناەۆ وقيعا جايلى پىكىر ءبىلدىردى. سوزىنشە، قانداي جاعداي بولماسىن مەملەكەتتىك ورگانداردىڭ قىزمەتكەرلەرى حالىقپەن كەلىسىمگە كەلۋگە تىرىسادى.
"بۇگىنگى بولعان وقيعا مەنى قاتتى ساستىردى. مەن كوپ بالالى انالاردىڭ بۇل قىلىعىن كورىپ، نە ايتارىمدى بىلمەي قالدىم. ولاردىڭ اراسىندا مۇگەدەك بالانى تاربيلەپ وتىرعاندارى بار، الايدا ايەلدەردىڭ مينيسترلىكتىڭ مۇگەدەك قىزمەتكەرىنە كورسەتكەن وزبىرلىعى ادام نانعىسىز. ولار عيماراتقا باسا كوكتەپ كىرىپ، ءوزىن قورعاي المايتىن قىزمەتكەردى تارپا باس سالدى. كۇش كورسەتىپ، بالاعاتتاي باستادى. بەيشارا قىزدىڭ، كەرىسىنشە، ولارعا كومەكتىسكىسى كەلەتىنىن ەشكىم دە تىڭدامادى", – دەيدى بايتاناەۆ.
ول بۇل جاعدايدى مىسالعا كەلتىرە وتىرىپ، حالىقتى سابىرلىققا شاقىردى.
"مۇگەدەك جانداردىڭ مۇددەسىن قورعايمىز دەگەن ولار مۇمكىندىگى شەكتەۋلى قىزعا قاتىستى وسىنداي قىلىق تانىتىپ وتىر. بۇل نە دەگەن ەكىجۇزدىلىك؟ ءبىز زايىرلى ءارى زاڭعا نەگىزدەلگەن مەملەكەتتە ءومىر ءسۇرىپ جاتىرمىز. سول سەبەپتى اركىمنىڭ ۇنىنە قۇلاق اسۋعا دايىنبىز. ەگەر سۇراقتارىڭىز بەن شەشىلمەگەن ماسەلەلەرىڭىز بولسا، اشۋعا بەرىلمەي كەلىپ تۇسىندىرىڭىزدەر. ءبىز تىڭداۋعا دايىنبىز", – دەدى بايتاناەۆ.
ەسكە سالساق، بۇعان دەيىن مەملەكەت باسشىسى ۆاكتسينا العىسى كەلمەيتىن ادامدار بىردەي ەمەس جانە ولارمەن جۇمىس ىستەۋدە ءارتۇرلى ءتاسىلدى قولدانۋ قاجەت ەكەنىن ايتقان بولاتىن.
