الماتى قالاسىنىڭ باس مەملەكەتتىك سانيتار دارىگەرى جانداربەك بەكشين بريفينگ كەزىندە ءتورتىنشى تولقىن اياسىندا كوروناۆيرۋستىڭ تارالۋىنا قاتىستى بولجامىن ايتتى، دەپ حابارلايدى «ادىرنا» ۇلتتىق پورتالى.
ول كوروناۆيرۋستىڭ شارىقتاۋ شىڭى جازدىڭ اياعىندا بولاتىنىن ايتىپ ءوتتى.
«بۇل شامامەن تامىز ايىنىڭ باسى مەن ورتا كەزىندە بولادى دەپ ويلايمىز. ال قىركۇيەك ايىنىڭ باسىندا كورسەتكىش تومەندەۋى ءتيىس»، - دەدى بەكشين.
قالانىڭ باس سانيتار دارىگەرى ۆاكتسيناتسيا قارقىنىن جىلدامداتۋدىڭ ماڭىزدىلىعىنا توقتالدى. وسىنىڭ ارقاسىندا وقۋ جىلىنىڭ باسىندا حالىقتىڭ يممۋنيتەتى قالىپتاسا باستايدى.
سونداي-اق بەكشين ەكپە پۋنكتەرىندە ۆاكتسيناعا تاڭداۋ از دەيتىندەرگە جاۋاپ بەردى. ول قولدا بارىن سالدىرۋ كەرەك دەپ وتىر.
«ءبىز ەكپە پۋنكتەرىن دۇكەنگە اينالدىرۋدى ماقسات ەتىپ وتىرعان جوقپىز. ۇكىمەت تەگىن ۆاكتسينا ۇسىندى. ول – «سپۋتنيك V». قازىرگى ۋاقىتتا بىزدە ۆاكتسينا جەتكىلىكتى. بۇگىن تاڭەرتەڭ قوردا 40 مىڭى قالدى. ۆاكتسينا كەستەگە ساي جەتكىزىلىپ جاتىر، قور تولىعۋدا»، - دەدى ول.
"ادىرنا" ۇلتتىق پورتالى
