كوروناۆيرۋستىڭ «دەلتا پليۋس» شتاممى سالدارىنان جاپپاي لوكداۋن قايتا باستالۋى مۇمكىن. بۇل تۋرالى دۇنيەجۇزىلىك دەنساۋلىق ساقتاۋ ۇيىمنىڭ رەسەيدەگى رەسمي وكىلى مەليتا ۆۋينوۆيچ مالىمدەدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
«ۆاكتسينالاۋ مەن بەتپەردە رەجيمى، سەبەبى «دەلتا» شتاممى كەزىندە ۆاكتسينانىڭ ءوزى جەتكىلىكسىز. قازىرگى كەزدە قىسقا ۋاقىتتىڭ ىشىندە بار كۇش-جىگەرىمىزدى سالۋىمىز قاجەت. ايتپەسە، لوكداۋن بولۋى مۇمكىن»، - دەيدى ۆۋينوۆيچ.
ونىڭ ايتۋىنشا، ەكپەدەن باس تارتۋعا بولمايدى. سەبەبى ۆاكتسينا ۆيرۋستىڭ تارالۋىن باسەڭدەتەدى جانە ىندەتتىڭ اۋىر فورماسىنا شالدىعۋ ىقتيمالدىلىعىن تومەندەتەدى.
«جالپى يممۋنيتەت پەن ءجۇرىس-تۇرىس ءتارتىبى، بۇل دەگەنىمىز، ۆيرۋستىڭ تارالۋىن تومەندەتۋ ءۇشىن قوسىمشا شارالار قاجەت بولادى»، - دەپ اتاپ كورسەتتى ۇيىم وكىلى.
وسى ورايدا ۆۋينوۆيچ «دەلتا پليۋس» شتاممىنىڭ قاۋىپتى ەكەنىن ەرەكشە اتاپ ءوتتى. ۆيرۋس تارالۋ قارقىنى ۇدەپ بارادى.
«دەلتا-شتامم جاسۋشالاردىڭ ءبىراز بولىگىن زاقىمدايدى. ناۋقاستان كوپ ادام جانە جىلدام ينفەكتسيا جۇقتىرادى... ءبىز ونىڭ شارىقتاۋ شەگىن ءالى كورىپ وتىرعان جوقپىز، ۆيرۋس ۇدەپ بارادى»، - دەيدى ۆۋينوۆيچ.
ايتا كەتەيىك، كوروناۆيرۋستىڭ «دەلتا» دەپ اتالاتىن قوس مۋتاتسياسى ءۇندىستاندا ناۋرىز ايىندا انىقتالعان بولاتىن. ال ماۋسىمدا ۇندىستاندىق عالىمدار «دەلتانىڭ» تاعى مۋتاتسياعا ۇشىرىپ، «دەلتا پليۋسقا» اينالعانىن مالىمدەدى. ول كوروناۆيرۋستىڭ انتيدەنەلەرگە توزىمدىلىگىن ارتتىرادى. سوندىقتان ەكپە سالدىرعاندار دا COVID-19 جۇقتىرۋى مۇمكىن. «دەلتانىڭ» ءوزى جوعارى جۇققىشتىعىمەن ەرەكشەلەنەدى جانە انىقتالعان شتاممدارعا قاراعاندا 60%-كە تەز جۇعادى. قازىرگى اينالىمداعى شتاممدار 1 ادامنان ورتاشا ەسەپپەن 3-4 ادامعا تارالسا، «ءۇندى» شتاممى 5-6 ادامعا بىردەن جۇعادى. ينكۋباتسيالىق كەزەڭى نەبارى 7 كۇنگە سوزىلادى.
سوڭعى زەرتتەۋلەر كوروناۆيرۋستىڭ «ءۇندى» شتاممىمەن اۋىرعاندار اراسىندا اۋرۋحانا توسەگىنە تاڭىلعاندار جانە قايتىس بولعاندار كوبىرەك ەكەنىن كورسەتتى. الماتى قالاسىندا جاسالعان 45 سىنامادان ءۇندى شتاممى تابىلدى.
"ادىرنا" ۇلتتىق پورتالى
