رەسەيدە كوروناۆيرۋستىڭ جاڭا تولقىنى باستالدى. بۇگىندە كوروناۆيرۋستىڭ جاڭا جاعدايلارى ەلوردادا وتكەن جىلدىڭ رەكوردتىق دەڭگەيىنە جاقىندادى. ماسكەۋ تاعى دا كوروناۆيرۋستىق دەمالىس جاريالادى جانە ادامدارمەن جۇمىس ىستەيتىندەردىڭ بارلىعىنا مىندەتتى ۆاكتسيناتسيا تۋرالى قاۋلى شىعاردى. سانكت-پەتەربۋرگتە دە جاڭا شەكتەۋلەر ەنگىزىلدى. اۋرۋدىڭ كوبەيۋى ەكى قالادان باسقا جەرلەردە دە تىركەلىپ جاتىر. رەسەيلىك باق ءۇشىنشى تولقىننىڭ بولاشاقتا ەمەس، قازىر باستالىپ كەتكەنىن ايتىپ شۋلاپ جاتىر، دەپ حابارلايدى «ادىرنا» ۇلتتىق پورتالى.
حالىقتىڭ كوروناۆيرۋس جۇقتىرۋ ستاتيستيكاسى قالاي وزگەردى؟
رەسەي كوروناۆيرۋس ىندەتىن جۇقتىرۋدىڭ شىڭىنا جەتكەندەي. ماۋسىم ايىنىڭ اياعىندا ءبىر كۇندە COVID-19 جۇقتىرعانداردىڭ سانى 25 مىڭعا جەتۋى مۇمكىن. بۇل تۋرالى سانكت-پەتەربۋرگ مەملەكەتتىك ۋنيۆەرسيتەتىنىڭ ەنەرگەتيكالىق جۇيەلەردى ماتەماتيكالىق مودەلدەۋ كافەدراسىنىڭ مەڭگەرۋشىسى، ۋنيۆەرسيتەتتىڭ ينتەللەكتۋالدى لوگيستيكا ورتالىعىنىڭ باستىعى ۆيكتور زاحاروۆ ايتتى.
COVID-19 اۋرۋى ەلدە 5 ماۋسىمنان باستاپ ءوستى. كەيىنگى ەكى ايدا رەسەيدە كوروناۆيرۋستى كۇنىنە 7-8 مىڭ ادام جۇقتىرعان بولسا، قازىر ول 14 مىڭنان استى.
ماتەماتيكالىق مودەلدى قولدانعان عالىمدار ماۋسىم ايىنىڭ سوڭىنا قاراي بۇل كورسەتكىشتىڭ ەكى ەسەگە ارتۋى مۇمكىن ەكەندىگىن ايتتى.
«ەپيدەميانىڭ قازىرگى تولقىنىنىڭ جاڭا جاعدايلارىنىڭ ماكسيمالدى سانى ماۋسىم ايىنىڭ سوڭىندا تىركەلۋى مۇمكىن - شامامەن 25 مىڭ. بۇل جاعدايدا ەپيدەميانىڭ شارىقتاۋ شەگى شىلدە ايىنىڭ ورتاسىندا بولادى»، - دەدى عالىم.
بۇعان دەيىن Peterburg2 حابارلاعانداي، بۇگىننەن باستاپ سانكت-پەتەربۋرگتە كوروناۆيرۋسقا قارسى جاڭا شەكتەۋلەر ەنگىزىلەدى. ساۋدا ورتالىقتارىندا فۋد-كورتتار، بالالارعا ارنالعان ويىن-ساۋىق ورتالىقتارى جانە ساۋدا ورىندارى جابىق بولادى. ساعات 2:00-دەن 6:00-گە دەيىن تاماقتانۋ مەكەمەلەرى ءۇشىن كومەندانتتىق ساعات ەنگىزىلەدى.
سونىمەن قاتار سولتۇستىك استانادا قوعامدىق كولىكتەردە ماسكا رەجيمىنىڭ ساقتالۋىنا باقىلاۋ كۇشەيتىلدى. ماسكانىڭ جوقتىعى ءۇشىن ايىپپۇل (4000 رۋبل) سالىنباق.
كوروناۆيرۋستىڭ ءۇشىنشى تولقىنى قاشانعا دەيىن سوزىلادى؟
كوروناۆيرۋس پاندەمياسىنىڭ ءۇشىنشى تولقىنى كەمىندە ءبىر ايعا سوزىلۋى مۇمكىن. بۇل تۋرالى ينفەكتسيالىق دارىگەر ەۆگەني تيماكوۆ ايتتى.
بۇعان دەيىن تيماكوۆ COVID-ءتىڭ ءۇشىنشى تولقىنى ءساۋىر ايىندا باستالعانىن، «اۋرۋدىڭ جوعارىلاۋىن ەسكەرە وتىرىپ، شارالار قولدانىلماسا جانە ۆيرۋسقا قارسى قوسىمشا شارالار قابىلدانباسا، كۇزدەگىدەي ءوسىمنىڭ بولاتىنىن» ەسكەرتتى.
«قازىر ءبىزدىڭ كورىپ وتىرعانىمىز - ءۇشىنشى تولقىننىڭ شارىقتاعان جەرى. بۇل كورسەتكىشتىڭ كەم دەگەندە ءبىر ايعا سوزىلىپ كەتۋىنەن قورقامىن. سەبەبى ۆيرۋس جاز مەزگىلىندە بۇرىنعىدان دا جىلدام تارالۋى مۇمكىن»، - دەيدى تيماكوۆ.
"ادىرنا" ۇلتتىق پورتالى
