17-19 ماۋسىم كۇندەرى شىعىس قازاقستان وبلىسى اباي اۋدانىندا "ىرعىزدان ىرعىزبايدىڭ ەلىنە" اتتى اقتوبە وبلىسى ىرعىز اۋدانىنىڭ مادەني كۇندەرى وتكىزىلەدى. وسىعان وراي بۇگىن اقتوبەلىك دەلەگاتسيا جولعا شىقتى دەپ حابارلايدى "ادىرنا" ۇلتتىق پورتالىنىڭ ءتىلشىسى.
اقتوبە وبلىسى اكىمى وڭداسىن ءورازاليننىڭ قولداۋىمەن جۇزەگە اسىرىلعان ءىس-شارانىڭ ماقساتى — وڭىرلەر اراسىنداعى ءوزارا بايلانىستى نىعايتۋ، قازاقتان شىققان ۇلى تۇلعالار مەن قاسيەتتى مەكەندەردى ناسيحاتتاۋ.
اتالعان جوبا ەل تاۋەلسىزدىگىنىڭ 30 جىلدىق مەرەيتويىنا وراي، سونداي-اق "رۋحاني جاڭعىرۋ" باعدارلاماسى اياسىندا ۇيىمداستىرىلىپ وتىر.
ەكسپەديتسيانىڭ جولعا شىعۋىنا وراي وتكىزىلگەن سالتاناتتى شارادا وبلىس اكىمىنىڭ كەڭەسشىسى ق.بولىسوۆ، ىرعىز اۋدانىنىڭ اكىمى ءا.اۋەلباەۆ، ىرعىز اۋدانىنىڭ قۇرمەتتى ازاماتى ن.سارسەنبايۇلى، ت.ب. دەلەگاتسيا مۇشەلەرىنە ءسات-ساپار تىلەپ، سەكسەننىڭ سەڭگىرىندەگى اقساقال سەيىتقۇل ماحاەۆ جولاۋشىلارعا اق باتاسىن بەردى.
ىرعىزدان شىققان ەكسپەديتسيا اۆتوكولىكپەن قوستاناي، قاراعاندى وبلىستارى ارقىلى ىرعىز-تورعاي، كەڭگىر وزەندەرىنىڭ بويىمەن ءجۇرىپ، ىرعىزباي ايدوسۇلى مەن ءىنىسى تورعاي، اعاسى كەڭگىرباي تۋعان جەرلەردى، ياعني سول داۋىردەگى ابايدىڭ اتا-بابالارى مەكەندەگەن جەرلەردى ارالايدى. سونداي-اق سەمەي جەرىنە باراتىن ەكىنشى توپ بۇگىن تەمىر جول ارقىلى جولعا شىعادى.
— وتكەن جىلى ۇلى ابايدىڭ تۋعانىنا، سونداي-اق ىرعىزدىڭ ىرگەتاسى قالانعانعانىنا 175 جىل تولدى. ىندەتتىڭ ورشۋىنە بايلانىستى بۇل مەرەيتويلاردى ءوز دەڭگەيىندە اتاپ ءوتۋدىڭ مۇمكىندىگى بولمادى. دەگەنمەن رۋحاني كەڭىستىگىمىزدى تولتىراتىن، جاس ۇرپاققا تاربيەلىك ماڭىزى زور شارالار ەشقاشان توقتاماۋى ءتيىس. سوندىقتان بۇگىنگى ەپيدەميولوگيالىق احۋالدىڭ تۇراقتانىپ كەلە جاتقانىن ەسكەرە وتىرىپ، وسىنداي جوبانى قولعا الىپ وتىرمىز. دەلەگاتسيا مۇشەلەرىنىڭ باسىم بولىگى ۆاكتسينا العان، بارلىق شارالار ساقتىق تالاپتارىن قاتاڭ ساقتاي وتىرىپ وتكىزىلەتىن بولادى، — دەيدى ۇيىمداستىرۋشىلار.
ايتا كەتۋ كەرەك، اباي جەرىنە اقتوبە وبلىسىنان 50 شاقتى ادام بارادى. ولاردىڭ قۇرامىندا ىرعىزدان شىققان وبلىسقا، اۋدانعا تانىمال تۇلعالار، قوعام بەلسەندىلەرى، ونەرپازدار جانە باق وكىلدەرى بار.
"ادىرنا" ۇلتتىق پورتالى.
