اسحات ايماعامبەتوۆ ۇستازدارعا حات جازدى

2520
Adyrna.kz Telegram

ءبىلىم جانە عىلىم ءمينيسترى اسحات ايماعامبەتوۆ قازاقستاندىق ۇستازدارعا حات جازدى، دەپ حابارلايدى «ادىرنا» ءتىلشىسى.

«قىمباتتى ارىپتەسىم! مىنە، بارشامىز ءۇشىن قيىن ءارى ەرەكشە بولعان وقۋ جىلى دا ءوز مارەسىنە جەتتى. بۇل وقۋ جىلى ايانباي قىزمەت ەتكەن ءار مۇعالىمنىڭ ەرەن ەڭبەگىمەن جانە ەرلىگىمەن ەسىمىزدە قالارى ءسوزسىز. مەكتەپتەرگە مۇلدەم جاڭا وقىتۋ ادىستەرىنە كوشۋ وڭايعا سوقپاعانىن ءبارى بىردەي تۇسىنە بەرمەيدى. وكىنىشكە وراي، ءبىز ءداستۇرلى وقىتۋ فورماتىنا تولىقتاي كوشە المادىق. پاندەميانىڭ سالدارى ءبىلىم بەرۋ جۇيەسىنە ءالى دە اسەر ەتەتىنى انىق.

دەگەنمەن، ءسىز بارلىق قيىندىق پەن سىن-تەگەۋرىندەرگە قاراماستان، ساباقتارىڭىزدى ۇتىمدى ۇيىمداستىرىپ، مۇمكىندىگىنشە جاقسى ناتيجە كورسەتە الدىڭىز. ءسىز ۇستاز ماماندىعىنىڭ سەزىمتالدىق، بالالارعا دەگەن قامقورلىق جانە ادامگەرشىلىك سىندى ەڭ جاقسى قاسيەتتەرىن تانىتۋدىڭ جارقىن ۇلگىسىنە اينالدىڭىز. الايدا، جۇمسالعان كۇش-جىگەرگە قاراماستان، قاشىقتان وقىتۋ كەزىندە ءارتۇرلى سەبەپتەرگە بايلانىستى ارتتا قالعان بالالاردىڭ بىلىمدەرى مەن باسقا وقۋشىلاردىڭ ءبىلىم دەڭگەيىن سالىستىرعاندا الشاقتىق بايقالادى.

بۇل جاعدايدىڭ ورىن العانىنا بالالار كىنالى مە؟ ارينە، بالالاردىڭ ەش كىناسى جوق. ولار ءداستۇرلى فورماتتا ءبىلىم السا، ءسىزدىڭ قولداۋىڭىزدى سەزىنىپ، وزدەرىن كورسەتە الار ەدى دەپ سەنەمىن»،–دەدى ول.

مينيستر پاندەميا كەزىندە وقۋ باعدارلاماسىنان قالىپ قويعان وقۋشىلارمەن جۇمىس ىستەۋدىڭ قيىن ەكەنىن دە اتاپ ءوتتى.

«ولارعا بۇل ولقىلىقتاردىڭ ورنىن تولتىرۋ ءۇشىن مۇمكىندىك بەرۋىمىز كەرەك پە؟ البەتتە. مەن، ءسىزدىڭ ارىپتەسىڭىز رەتىندە، ماماندىعىمىزعا ءتان قاسيەت - ىزگىلىككە ۇمتىلىپ، شاكىرتتەرىڭىزگە كومەك قولىن سوزۋىڭىزدى سۇرايمىن.

جىگەرلى ءارى العىر مەكتەپ وقۋشىلارىمەن جۇمىس ىستەۋ وڭايىراق. دەگەنمەن، پاندەمياعا بايلانىستى وقۋ باعدارلاماسىنان قالىپ قويعان وقۋشىلارمەن جۇمىس جاساۋ وڭاي ەمەس.

وقۋشىلاردىڭ ءبىلىمى بويىنشا ارتتا قالۋى ولاردىڭ مۇمكىندىكتەرى سونداي دەگەن ءسوز ەمەس. ءبىلىم بەرۋدەگى ولقىلىقتاردى قيىن جاعداي مەن وقۋشىلاردى جىگەرلەندىرۋ دەڭگەيىنىڭ جەتكىلىكسىزدىگىمەن سيپاتتاۋعا بولادى.

مۇنداي بالالار قازىر بارلىق نازارىمىزدى قاجەت ەتەدى. ولاردىڭ الەۋەتى زور. سوندىقتان بالالارىمىزعا قولداۋ كورسەتۋىمىز كەرەك.

بۇلدىرشىندەرىمىزدى ءوز قامقورلىعىڭىزعا الىپ، قيىندىقتارعا قاراماستان ولقىلىقتاردىڭ ورنىن قوسىمشا ساباقتار وتكىزۋ ارقىلى تولتىراسىزدار دەپ ۇمىتتەنەمىن. مەنىڭ بۇل ءوتىنىشىمدى قابىل الۋىڭىزدى سۇرايمىن.

سونىمەن بىرگە ءسىزدى جازعى مەكتەپتەردىڭ جۇمىسىنا 26 مامىر - 20 ماۋسىم ارالىعىندا بەلسەنە قاتىسۋعا شاقىرامىن.

وسى جىلى سوڭعى قوڭىراۋ مەرەكەسىندە ەرەكشە سەزىمگە بولەنگەنىڭىزدى بىلەمىن. ويتكەنى، ءبىر جاعىنان وقۋ جىلى اياقتالىپ جاتسا، ەكىنشى جاعىنان - جازعى مەكتەپتەر جۇمىس ىستەي باستادى. ءبىز مۇنداي جاعدايدىڭ قايتالانباۋى ءۇشىن قولدان كەلگەننىڭ ءبارىن جاسايتىن بولامىز.

قاشىقتان ءبىلىم بەرۋ كەزىندە ارىپتەستەرىم الەۋمەتتىك جەلىلەردى بەلسەندى ءارى ەركىن مەڭگەرە باستاپ، ءوز ساباقتارىنا ويىن ەلەمەنتتەرىن ەنگىزە باستاعانىن ەرەكشە اتاپ وتكىم كەلەدى.

ءبىز، ارينە، وسىنداي كاسىپقوي ماماندارىمىزدى ۇنەمى قولداپ، ولاردى باسقالار ءۇشىن ۇلگى ەتەمىز. بۇل ءۇردىس ۇمىتىلماي، كەرىسىنشە، ودان دا ۇلكەن اسەرگە يە بولادى دەپ ۇمىتتەنەمىن.

وقۋشىلارعا تاربيە بەرۋ ماسەلەسى مۇعالىم جۇمىسىندا وتە ماڭىزدى، سول سەبەپتى بۇل باعىتتا اتا-انالارمەن بىرلەسە جۇمىس جاسالۋى ءتيىس.

ءسىز بالامەن ونىڭ جانىندا وتباسى مەن جاقىندارى بولمايتىن بوتەن ورتادا جۇمىس جاساپ، وقۋشىنىڭ بويىندا بولۋى مۇمكىن پروبلەمالارى تۋرالى اتا-انالارىنا دەر كەزىندە ايتا الاسىز.

بالا وتباسىندا دا، مەكتەپتە دە وعان باسا نازار اۋدارىلاتىنىن سەزىنۋى كەرەك. بۇعان تەك اتا-انالارمەن تىعىز بايلانىستا، ولارمەن تەڭ جانە سەرىكتەستىك قارىم-قاتىناس قۇرۋ ارقىلى قول جەتكىزۋگە بولادى.

بالالاردىڭ قىزىعۋشىلىعىن وياتىپ، ولاردى قاتەلىكتەرى ءۇشىن ايىپتاماڭىز. كەرىسىنشە، ورىن العان قاتەلىكتەرىن تۇزەتۋگە كومەكتەسىڭىز. سوڭى ساتتىلىككە ۇلاسپاعان ارەكەتتەرىنەن كەيىن ءۇمىت پەن سەنىمدى جوعالتپاۋعا ۇيرەتىڭىز. بالالار وزگەشە ويلاپ، ءوز پىكىرىن بىلدىرگەندەرى ءۇشىن ولاردىڭ ۇپايلارىن تومەندەتپەڭىز.

قازىر بالالارىمىز ولارعا بارىنشا تۇسىنىستىكپەن قاراعانىمىزدى اسا قاجەت ەتەدى. ولارعا ماحاببات پەن قامقورلىق قاجەت. ءبىز بۇلدىرشىندەرىمىزدىڭ مەكتەپكە بارىپ، ءبىلىم العاندارىن قالايمىز. سونىمەن قاتار بالالارىمىزدى باسقالارمەن سالىستىرعانىمىزدى توقتاتۋ كەرەك.

پاندەميا جاعدايى مۇعالىمنىڭ باستى قىزمەتى تەك اقپارات بەرۋ ەمەس، سونداي-اق ونىڭ باسقا دا مىندەتتەرىن ايقىنداپ بەردى. اتاپ ايتساق، بالالارعا قولداۋ كورسەتۋ، جاناشىرلىق تانىتۋ، ولاردى ىنتالاندىرۋ، كومەك قولىن سوزىپ، تالىمگەر بولۋ.

بۇگىنگىنىڭ بالالارى مۇلدەم وزگەشە، ولار وزدەرىن ەركىن ۇستايدى. ەندىگى كەزەكتە ولاردىڭ بويلارىنداعى جاقسى قاسيەتتەردى ساقتاپ، ودان ءارى دامىتۋ - ءبىزدىڭ باستى مىندەتىمىز.

قىمباتتى ارىپتەس!

حاتىمدى اياقتاي وتىرىپ، ءسىزدى ۆاكتسيناتسيا ناۋقانىندا بەلسەندى ازاماتتىق ۇستانىمىڭىزدى تانىتىپ، ۆاكتسيناتسيا تۋرالى عىلىمي دەرەكتەردى تاراتۋ بارىسىندا كومەك كورسەتۋىڭىزدى سۇرايمىن. سونداي-اق اتالعان تاقىرىپ اياسىنداعى جالعان اقپاراتپەن كۇرەسۋگە شاقىرامىن.

مەن وقىتۋدىڭ ءداستۇرلى فورماتىن قولدايمىن جانە بۇلدىرشىندەرىمىز ءۇشىن مەكتەپ ەسىكتەرى ايقارا اشىلادى دەپ ۇمىتتەنەمىن. حالىق ۆاكتسيناتسيا ناۋقانىنا نەعۇرلىم بەلسەندى قاتىسسا، ادەتتەگى ءومىر ىرعاعىنا سوعۇرلىم تەزىرەك ورالاتىنىمىز ءسوزسىز.

ەل پرەزيدەنتى قاسىم-جومارت كەمەلۇلى توقاەۆتىڭ تۇراقتى قولداۋىنىڭ ارقاسىندا پاندەميا زارداپتارىن ازايتۋ مۇمكىندىگىنە يە بولدىق. قيىندىقتاردى ەڭسەرىپ، وقۋ ءۇردىسىن قامتاماسىز ەتە الدىق.

وسى قيىن-قىستاۋ كەزەڭدە مەن سىزبەن بىرلەسە وتىرىپ، جۇمىس ىستەۋ قۇرمەتىنە يە بولدىم.
وسى رەتتە تۇسىنىستىك تانىتىپ، قولداۋ كورسەتكەنىڭىز ءۇشىن جانە ادال قىزمەتىڭىز ءۇشىن العىس بىلدىرەمىن! باعا جەتپەس ۇستازدىق ەڭبەگىڭىز ءۇشىن، جانكەشتى جۇمىسىڭىز بەن كەز كەلگەن ۋاقىتتا بالالارىمىزعا تىرەۋ بولۋعا دەگەن ىزگى نيەتىڭىز ءۇشىن راقمەت!

ءسىز – ناعىز باتىر، بيىلعى وقۋ جىلىنىڭ باستى كەيىپكەرى اتاندىڭىز.

سىزگە ساتتىلىك، مىقتى دەنساۋلىق تىلەيمىن! ءوزىڭىز بەن جاقىندارىڭىزعا جاناشىر بولىڭىز!

جازعى دەمالىس كەزىندە جاقسى دەمالىپ، جاڭا وقۋ جىلىنا كۇش-قۋاتپەن ورالۋىڭىزدى تىلەيمىن.

جاڭا وقۋ جىلىندا جولىققانشا!»،– دەپ ءسوزىن قورىتىندىلادى ايماعامبەتوۆ.

«ادىرنا» ۇلتتىق پورتالى

پىكىرلەر