ۇبت-نى الىپ تاستاۋ قاجەت — تالعات نارىكباەۆ

4021
Adyrna.kz Telegram

         جوعارى وقۋ ورنىن تاڭداعان كەزدە بىرقاتار ماسەلەلەرگە ءمان بەرۋ كەرەك. قازىر مەكتەپ تۇلەكتەرى ماماندىق تاڭداپ، ۋنيۆەرسيتەتكە تۇسۋگە دايىندالىپ جاتىر. MEDIA CLUB QAZAQSTAN پلاتفورماسىندا ءبىلىم سالاسىنىڭ ساراپشىلارى جوو تاڭداۋ بويىنشا پايدالى كەڭەستەمەن ءبولىستى. سونداي-اق ۇبت تۋرالى ءسوز قوزعادى.    

ەفير بارىسىندا كازگيۋ ۋنيۆەرسيتەتىنىڭ باسقارما توراعاسى تالعات نارىكباەۆ وقۋشىلارعا ارنالعان ۇبت-نى الىپ تاستاۋدى ۇسىندى. سپيكەردىڭ ايتۋىنشا، قر ءبىلىم جانە عىلىم مينيسترلىگى مەملەكەتتىك ءبىلىم گرانتتارىن ءبولۋ پروتسەسىندە جوو-لارعا تولىقتاي سەنىم ارتۋى ءتيىس. سونداي-اق ول مەكتەپ بالانى ۇبت-عا ەمەس، ۋنيۆەرسيتەتكە تۇسۋگە دايىنداۋى كەرەك ەكەنىن ايتتى.

         «مەكتەپتەردە بالالاردى تاپسىرمالاردىڭ جاۋابىن جاتتاۋعا ەمەس، شەشىمىن تابۋعا ۇيرەتۋ كەرەك. سونىڭ ارقاسىندا ولار مەكتەپ كەزىنەن  ويلانۋدى ۇيرەنەدى. ۇبت-نى الىپ تاستاپ، جوو-لار ستۋدەنتتەردى بۇرىنعىداي ەمتيحانمەن قابىلداۋ كەرەك. ەمتيحاندار تەست تۇرىندە ەمەس، ەۋروپا، امەريكاداعىداي بەلگىلى ءبىر تاپسىرمالار ارقىلى، بالانىڭ قابىلەتىن، بەلسەندىلىگىن انىقتاۋ بويىنشا وتكىزىلۋى كەرەك»،-دەدى ول.

قر بعم ۇلتتىق تەستىلەۋ ورتالىعىنىڭ ەكس-ديرەكتورى ديدار سماعۇلوۆ تالعات نارىكباەۆتىڭ پىكىرىمەن كەلىسەتىنىن ايتىپ، ۇبت-نىڭ جاڭا فورماتى تۋرالى سويلەدى.

         «نەگىزىندە مەن ۇبت بالانىڭ ءبىلىمىن تەكسەرۋدىڭ ەڭ ءتيىمدى، ەڭ وبەكتيۆتى قۇرالى ەمەس دەگەن پىكىرمەن كەلىسەمىن. بىراق قازىر ءبىز كومپيۋتەرلىك تەستىلەۋگە كوشتىك. جاڭا فورماتتى مەملەكەتتىڭ شىعىنىن ازايتىپ، پروتسەستى تسيفرلاندىرۋ ءۇشىن عانا ەنگىزگەن جوقپىز. ول وقۋشىنىڭ ءبىلىمىن باعالاۋ اياسىن كەڭەيتۋگە باعىتتالعان»،-دەپ اتاپ ءوتتى ديدار سماعۇلوۆ.

پىكىرلەر