قر ءبىلىم جانە عىلىم ءمينيسترى اسحات ايماعامبەتوۆ ەلدەگى مەكتەپ ديرەكتورلارىنىڭ پارا الاتىنىن مويىندادى. باس پەداگوگ ورتا ءبىلىم مەكەمەلەرىنىڭ باسشىلارى اسىرەسە قول استىنا مۇعالىمدەردى قابىلداعاندا ەكونوميكالىق قىلمىسقا بارادى دەيدى. بۇل «شىندىقتى ءبارىمىز بىلەمىز» دەگەن مينيستر، ءوزى جاۋاپتى سالاداعى وسىنداي بىلىقتاردى زاڭ نورمالارىمەن شەشۋگە تىرىسقانىن دا ايتتى. ياعني جاڭا مۇعالىمدى جۇمىسقا الاردا مەكتەپ باسشىسى ونىمەن بۇرىنعىداي تىكەلەي كەزدەسپەيدى. الدىمەن كونكۋرس جاريالانىپ، ۇمىتكەرگە قويىلاتىن تالاپتار جازىلماق. ەگەر مامان ساي كەلسە، كوميسسيا ونى ۇستازدىققا الۋ-الماۋ تۋرالى سوڭعى شەشىم شىعارادى. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
«ءارتۇرلى الىپ-قاشپا ءسوز بار، بىراق ونى الىپ-قاشپا ءسوز دەيمىز بە، كەلىسەمىز بە، كەلىسپەيمىز بە، شىندىقتى ءبارىمىز بىلەمىز. ومىردە قانداي جاعدايلار بولىپ جاتقانىن كورىپ ءجۇرمىز، سوندىقتان، ونداي ماسەلەلەردىڭ، تاۋەكەلدەردىڭ بارىن مويىنداۋىمىز كەرەك جانە ءبىز ونى بىلەمىز»، - دەيدى اسحات ايماعامبەتوۆ.
اسحات ايماعامبەتوۆ ونداعان جىلدار بويى ءبىر ورىندا تاپجىلاي وتىراتىن مەكتەپ باسشىلارى تۋرالى دا ايتتى. مينيستر قانشا تولقىن اۋىسسا دا شارشاماستان ءبىلىم ورداسىندا وكتەمدىك جۇرگىزۋگە ۇيرەنىپ قالعان ديرەكتورلار وبلىستاعى ارىپتەسىنىڭ ورنىنا جىبەرىلۋى مۇمكىن دەدى. اۋىس-ءتۇيىس جايى قازىر ارنايى ورتادا تالقىلانىپ جاتقان كورىنەدى. ەگەر ول ماقۇلدانسا، ەسكىدەن كەلە جاتقان ماماندار جىلى ورنىن باسقا مەكتەپكە اۋىستىرۋعا دايىن بولۋى كەرەك.
"ادىرنا" ۇلتتىق پورتالى
