اقمولادا 12 جاستاعى قىزدى زورلادى دەپ ايىپتالعان ازاماتتى القابيلەر سوتى اقتاپ شىقتى. بۇل تۋرالى «نەمولچي» قورى جازدى، دەپ حابارلايدى «ادىرنا» ۇلتتىق پورتالى Stan.kz سايتىنا سىلتەمە جاساپ.
جازبادا 2019-2020 جىلدارى 25-26 جاستاعى ازاماتتار 12 جاسار قىزدى زورلاپ كەلگەنى ايتىلعان.
«25 مامىردا كوكشەتاۋدا ايىپتالۋشىلاردىڭ ءبىرى 20 جىلعا، ەكىنشىسى 21 جىلعا سوتتالدى. ولاردىڭ ارقايسىسى جابىرلەنۋشىگە ەكى ميلليون تەڭگە وتەماقى تولەۋى ءتيىس. ال ءۇشىنشى ايىپتالۋشى القابيلەر سوتىنا جۇگىنەمىن دەگەن تالاپ قويدى. ولار 8 ماۋسىمدا كۇدىكتىنى اقتاپ شىقتى. قىزدىڭ اناسىنىڭ ايتۋىنشا، القابيلەر باستارىن تومەن سالبىراتىپ، ۇيالىپ وتىرعان. ال پروكۋرور ايىپتالۋشىنى 20 جىلعا تۇرمەگە جابۋدى سۇراعان»، - دەلىنگەن جازبادا.
بۇل شەشىمدى اقمولا وبلىستىق قىلمىستىق ىستەر بويىنشا اۋداندىق سوتى ءتۇسىندىردى.
«تەرگەۋگە سايكەس سوتتا كامەلەتكە تولماعان بالانى زورلادى دەپ ايىپتالعان اقمولا وبلىسى، تسەلينوگراد اۋدانىنىڭ تۇرعىنىنا قاتىستى قىلمىستىق ءىس قازىلار القاسىنىڭ قاتىسۋىمەن قارالدى. زاڭعا سايكەس، ەگەر ءىستى القابيلەر سوتىندا قارالسا، ايىپتالۋشىلاردىڭ كىناسىنە نەمەسە كىناسىزدىگىنە قاتىستى ماسەلەلەر، سونداي-اق باسقا ماسەلەلەر جاسىرىن داۋىس بەرۋ ارقىلى شەشىلەدى»، - دەلىنگەن سوت حابارلاماسىندا.
جالپى داۋىس بەرۋگە 10 القابي مەن سۋديا قاتىسادى. بۇل جەردە سوتتىڭ داۋىسى ەسكەرىلمەيدى. ەگەر التى ادام ايىپتالۋشىعا شىعارىلعان ۇكىممەن كەلىسپەسە، كۇدىكتى اقتالادى.
«داۋىس بەرۋ ناتيجەسىندە كوپشىلىك زورلاۋ تۇرعىسىنان دا، 16 جاسقا تولماعان اداممەن جىنىستىق قاتىناس جاساۋ تۇرعىسىنان دا كۇدىكتىنى اقتاۋعا كەلىسىپ، داۋىس بەردى. قازىلار القاسىنىڭ ۇكىمى نەگىزىندەايىپتالۋشى قىلمىستىق كودەكستىڭ 4-بولىگىنىڭ 120-بابى «كامەلەتكە تولماعاندى زورلاۋ» بويىنشا قىلمىستىق قۇقىق بۇزۋشىلىق جاساۋعا بايلانىستى وقيعاعا قاتىسى بولماعانى ءۇشىن اقتالدى»، - دەپ قوستى سوت وكىلدەرى.
ۇكىم زاڭدى كۇشىنە ەنگەن جوق، ايىپتاۋشى تاراپ اپەللياتسياعا جۇگىنە الادى.
ەسكە سالساق، بۇعان دەيىن 2020 جىلى ءۇش ەر ازامات 12 جاستاعى قىزدى زورلادى دەپ ايىپتالعان ەدى.
"ادىرنا" ۇلتتىق پورتالى
