رەسەي قاراقۇمىق ەكسپورتىنا تىيىم سالدى

2226
Adyrna.kz Telegram

رەسەي 5 ماۋسىمنان باستاپ قاراقۇمىق ەكسپورتىنا تىيىم سالدى، بۇل 31 تامىزعا دەيىن سوزىلادى. رەسەي ۇكىمەتى ءتيىستى قاۋلىنى ءساۋىر ايىنىڭ سوڭىندا قابىلداعان دەپ حابارلايدى "ادىرنا" ۇلتتىق پورتالى "ريا نوۆوستيگە" سىلتەمە جاساپ.

ۋاقىتشا تىيىمنىڭ حالىقارالىق گۋمانيتارلىق كومەك تاۋارلارىنا، ترانزيتتىك تاۋارلارعا، رەسەيدىڭ باسقا ەلدەردەگى اسكەري قۇرىلىمدارىنىڭ قىزمەتىنە جانە بايقوڭىر مەن شپيتسبەرگەندەگى رەسەيلىك ۇيىمدارعا قاجەت ونىمگە قاتىسى جوق.

بيداي ەكسپورتتاۋشىلارىنىڭ مالىمەتىنە سايكەس، رەسەيلىك قاراقۇمىقتىڭ نەگىزگى يمپورتتاۋشىلارى – قىتاي، لاتۆيا جانە ۋكراينا.

2020 جىلدىڭ شىلدەسىنەن بيىلعى جىلدىڭ ساۋىرىنە دەيىن قىتايعا 26,228 مىڭ توننا، لاتۆياعا 14,339 مىڭ توننا، ۋكرايناعا 13,189 مىڭ توننا قاراقۇمىق جەتكىزىلگەن. بۇدان بولەك ليتۆا 9,812 مىڭ توننا جانە جاپونيا 8,536 مىڭ توننا يمپورتتاعان.

وتكەن جىلى رەسەيدە 892 مىڭ توننا قاراقۇمىق وسىرىلگەن.

قازاقستان بىلتىر توتەنشە جاعداي ەنگىزىلگەن ۋاقىتتا قاراقۇمىق پەن كەيبىر ازىق-تۇلىك تاۋارلارىنىڭ ەكسپورتىنا تىيىم سالعان بولاتىن.

"ادىرنا" ۇلتتىق پورتالى.

پىكىرلەر