ەل ەكى سيىرىن جايا الاتىن جەر تاپپاسا، جەرىمىزدىڭ كەڭدىگىنەن نە پايدا؟
جەر بولماسا - ەل بولمايدى!
قر پارلامەنتى ءماجىلىسى دەپۋتاتى، “اق جول” پارتياسى فراكتسياسى مۇشەسى قازىبەك يسانىڭ ءماجىلىستىڭ جالپى وتىرىسىنداعى ءسوزى:
باعزى زاماننان باتىر بابالارىمىز قانى مەن تەرىن توگىپ، جانىمەن قورعاعان قازاقتىڭ قاسيەتتى بايتاق جەرى - قاي كەزدە دە، بارلىق ۇعىمداردان جوعارى!
ءبىزدىڭ داۋىرىمىزگە دەيىن ءومىر سۇرگەن عۇن يمپەرياسىنىڭ قاعانى مودە بابامىزدان كورشىلەس جاتقان مەملەكەتتىڭ پاتشاسى ەڭ جۇيرىك تۇلپارىن سۇراسا دا، ۇيىندەگى اسىل جارىن، ىڭكارىن سۇراسا دا “ەل سوعىسىپ، قان توگىلمەي-اق قويسىن” دەپ بەرىپ جىبەرىپتى. بار اسىلىن سۇراعاندا ۇندەمەي كەلىسكەن قاعان
داندەگەن جاۋ جەرىن سۇراپ كەلگەندە، “ال ەندى ءبىز سوعىسامىز، تۇرىساتىن جەرىڭدى ايت!”-دەپ، اتقا قونىپ، ەلگە ۇران تاستاپتى!
ءبىز سول عۇنداردىڭ ۇرپاعىمىز!
بۇدان ءبىر عاسىر بۇرىن الاش كوسەمى ءاليحان بوكەيحان دا “جەر دەگەندە دىرىلدەمەي بولمايدى” دەپ ەلگە ۇندەۋ تاستاپ ەدى.
ال 2016 جىلى ەلىمىزدە جەر داۋى كوتەرىلگەن كەزدە «اق جول» پارتياسى ءوزىنىڭ ناقتى رەسمي ۇستانىمىن ءبىلدىرىپ، جەردى شەتەلدىكتەرگە ساتپاۋ عانا ەمەس، جالعا دا بەرمەۋ تۋرالى ۇسىنىس جاساپ، دابىل قاقتى. بۇل ۇستانىم پارتيامىزدىڭ ساياسي باعدارلاماسىندا دا جازۋلى.
ال بيىلعى 2021 جىلدىڭ 20 قاڭتارىندا ءماجىلىستىڭ VII شاقىرىلعان جاڭا قۇرامىنىڭ ءبىرىنشى وتكەن جالپى وتىرىسىندا ءبىرىنشى بولىپ «اق جول» پارتياسى ۇكىمەتكە جەر كودەكسىنە ءتيىستى وزگەرىستەر ەنگىزىپ، ەلدى الاڭداتقان جەر داۋىنىڭ شەشىلۋىنە نۇكتە قويۋ كەرەكتىگى تۋرالى دەپۋتاتتىق ساۋال جاسادى. سودان سوڭ بيىلعى ۇلتتىق كەڭەستىڭ بەسىنشى وتىرىسىندا قازاقستان پرەزيدەنتى ق.توقاەۆتىڭ اۋىلشارۋاشىلىعى جەرىن شەتەلدىكتەرگە بەرۋگە تىيىم سالۋ تۋرالى تاپسىرماسى شىقتى.
بۇگىنگى بۇل زاڭ جوباسى مەملەكەت باسشىسى تاپسىرمالارىن ورىنداۋ ماقساتىندا جانە جەر رەفورماسى جونىندەگى كوميسسيا قىزمەتىنىڭ قورىتىندىسى.
-جەر زاڭىنا قوسىلعان بۇل وزگەرىستەردەن كەيىن جەردىڭ پايدالانىلۋى مەن قورعالۋىن مەملەكەتتىك باقىلاۋ كۇشەيەدى
-قازىر بارلىق جەردە داۋعا اينالعان مال جايۋعا قاجەتتى جايىلىمداردىڭ تاپشىلىعىن شەشۋ ءۇشىن، تەك قانا جەرگىلىكتى حالىقتىڭ مۇقتاجى ءۇشىن پايدالانىلاتىن جايىلىم اۋماقتارى ايقىندالادى.
ەل ەسىگىنىڭ الدىنداعى ەكى سيىرى مەن بەس قويىن جايا الاتىن جەر تاپپاسا، بايتاق جەرىمىزدىڭ كەڭدىگىنەن نە پايدا؟
قورىتا ايتقاندا، زاڭ جوباسى جەر زاڭناماسىن ودان ءارى جەتىلدىرۋگە، جەر قاتىناستارىنداعى بارلىق پروبلەمالاردى شەشۋگە ارنالۋى ءتيىس.
“اق جول” جەر داۋىنا نۇكتە قويۋعا شاقىرسا دا، جەردىڭ داۋلى باپتارى بويىنشا جەر كوميسسياسى تاعى دا موراتوري جاريالادى.
موراتوري - 5 جىل، ال جەرىمىز بەن ەلىمىز ماڭگىلىك بولۋى ءتيىس ەكەنىن ەشقاشان ۇمىتۋعا بولمايدى!
ويتكەنى، جەر بولماسا - ەل بولمايدى!
حالىقتىڭ باعا جەتپەس اسىل قازىناسى - قاسيەتتى قازاق جەرىنىڭ قادىرىنە جەتە بىلەيىك!
“اق جول” پارتياسى حالىق تالابىمەن جاسالعان زاڭ جوباسىن قولدايدى!
قۇرمەتپەن، “اق جول” پارتياسى فراكتسياسى مۇشەلەرى
