نۇر-سۇلتانداعى كوپبالالى انالار ەڭبەك جانە حالىقتى الەۋمەتتىك قورعاۋ مينيسترلىگى الدىنا جينالدى. ولار كۇن سايىن قىمباتتاپ جاتقان ازىق-تۇلىك باعاسى مەن الەۋمەتتىك جاعدايدىڭ تومەندىگىنە شاعىمداندى. شاپكەنوۆتەن جاۋاپ سۇراي كەلگەن توپقا مينيستر شىقپاعان سوڭ، ولار جوعارى بيلىكتەگىلەرگە قاراي بەت الدى. الايدا جولدى بوگەگەن ارنايى جاساق جينالعان توپتى ارى اسىرمادى، دەپ حابارلايدى «ادىرنا» ۇلتتىق پورتالى Stan.kz سايتىنا سىلتەمە جاساپ.
جينالعاندار بۇعان دەيىن بىرنەشە رەت ءتۇرلى مينيسترلىككە حات جازىپ، ۇندەۋ جولداسا دا ماردىمدى جاۋاپ الا الماعان ەكەن. ەندى ولار حالىقتىڭ الەۋەتىنە جاۋاپ بەرەتىن مينيسترلىك باسىشىسىمەن تىكەلەي جۇزدەسۋگە كەلگەن.
«ءبىرىنشى ماسەلە ول باسپانانىڭ قولجەتىمسىزدىگى. بۇگىنگى تاڭداعى «باقىتتى وتباسى»، «شاڭىراق» باعدارلامالارى بويىنشا الەۋمەتتىك وسال توپقا ءۇي الۋ مۇمكىن ەمەس. ەكىنشى ماسەلە، ازىق-تۇلىكتىڭ باعاسى»، - دەيدى قوعام بەلسەندىسى قاناعات شۇمەنوۆا.
حالىقتىڭ تۇرمىسىن تۇزەۋ ءۇشىن انالار بارلىق بالاعا 18 جاسقا دەيىن 42500 تەڭگە جاردەماقى تولەنۋى كەرەك دەيدى. ويتكەنى سوڭعى كەزدە مەكەنجاي بويىنشا بەرىلەتىن الەۋمەتتىك تولەمنىڭ دە كولەمى قىسقارىپ قالىپتى.
ال مينيستر ورنىنا شىققان مينيسترلىك وكىلى بۇل مۇمكىن ەمەس ەكەنىن ايتادى.
مينيسترلىكتىڭ باسقارما باسشىسىنىڭ جاۋابىنا قاناعاتتانباعان ازاماتتار جوعارى بيلىك پەن دەپۋتاتتارمەن تىلدەسەمىز دەگەن ۇمىتپەن توپتاسىپ ۇكىمەت ۇيىنە بەت الدى. ال ءدال وسى ۋاقىتتا ماجىلىستە بالا كۇتىمىنە تولەنەتىن جاردەماقىنى ءۇش جاسقا دەيىن كوتەرۋ، جالعا بەرىلەتىن ءۇيدى ساتىپ الۋ قۇقىعىن قايتارۋ، ءار بالاعا 18 جاسقا دەيىن ورتاشا ايلىق ەسەپتىك كورسەتكىش كولەمىندە جاردەماقى تولەۋ ماسەلەسى قارالىپ جاتقان ەدى.
«الەۋمەتتىك وسال توپقا ساي كەلەتىن تۇرعىن ءۇي باعدارلاماسىن ازىرلەۋ. ونىڭ پايىزدىق مولشەرلەمەسى 0-گە تەڭ جانە العاشقى جارناسى بولماۋى كەرەك»، - دەدى قر پارلامەنتى ءماجىلىسىنىڭ دەپۋتاتى ايجان سقاقوۆا.
سونداي-اق دەپۋتاتتار اۋىلدىق جەردە تۇراتىن ءار وتباسىعا 20 جۇزدىك جەر بەرۋ كەرەك دەگەن دە ۇسىنىس ايتتى. الايدا ءار قازاقستاندىققا زاڭ بويىنشا تيەسىلى 10 جۇزدىك بەرىلمەي وتىرعاندا دەپۋتاتتاردىڭ بۇل ۇسىنىسى ايدى اسپاننان الىپ بەر دەگەنمەن بىردەي سياقتى.
"ادىرنا" ۇلتتىق پورتالى
