الماتى وبلىسىندا اۋە اپاتىنان امان قالعان اسكەري قىزمەتكەرلەر ەسىن جيدى، دەپ حابارلايدى KTK تەلەارناسى.
ساعي بەيسەنبەكوۆ، الماتى № 4 كلينيكالىق اۋرۋحاناسىنىڭ باس دارىگەرى:
- جاعدايلارى تۇراقتى اۋىر، جانساقتاۋ بولىمىندە جاتىر. ەكى ناۋقاس تا ەسىن جيدى.
اپات قىزىلتۋ اۋىلىنىڭ ماڭىندا 13-ناۋرىزدا بولعان. نۇر-سۇلتان قالاسىنان كوككە كوتەرىلگەن ۇلتتىق قاۋىپسىزدىك كوميتەتى شەكارا قىزمەتىنىڭ ان-26 اسكەري ۇشاعى وتقا ورانىپ، الماتى اۋەجايىنىڭ ۇشىپ-قونۋ جولاعىنا جەتە الماي قۇلاعان.
اۋە كەمەسىنىڭ بورتىندا بولعان 6 ادامنىڭ تورتەۋى وقيعا ورنىندا اجال قۇشتى. ال ەسىن جيعانداردىڭ ءبىرى – ەكيپاج كومانديرى ارتەم اشيروۆ بۇعان دەيىن اۋىر حالدە جاتقان بولاتىن. قازىر دارىگەرلەر ەكى اسكەري قىزمەتكەردىڭ ءومىرىن ساقتاپ قالۋ ءۇشىن بارىن سالىپ جاتىر. ال اپاتتىڭ سەبەبىن ارنايى كوميسسيا تەرگەۋ اياقتالعان سوڭ جاريالايدى.
