ناۋرىز مەرەكەسى جانە قر تاۋەلسىزدىگىنىڭ 30 جىلدىعىنا وراي، ءال-فارابي اتىنداعى قازاق ۇلتتىق ۋنيۆەرسيتەتى «اعاش وتىرعىزۋ» قايىرىمدىلىق اكتسياسىنا قولداۋ ءبىلدىرىپ، 160-تان استام قىرىم قاراعايى مەن التاي شىرشاسىن وتىرعىزدى، دەپ حابارلايدى «ادىرنا» ءتىلشىسى.
يگىلىكتى شارا قازاقستان پرەزيدەنتى قاسىم-جومارت توقاەۆتىڭ قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋگە دايىندىق جونىندەگى مەملەكەتتىك كوميسسيانىڭ ءبىرىنشى وتىرىسىنداعى: «مەن ۇلىستىڭ ۇلى كۇنىن جاڭاشا اتاپ ءوتۋدى ۇسىندىم. بابالارىمىز ءاز ناۋرىز كەلگەندە بۇلاقتىڭ كوزىن اشىپ، اعاش وتىرعىزعان. وسى تاماشا ءداستۇردى جاڭا قارقىنمەن جالعاستىرايىق. تابيعاتتى تازالاپ، قورشاعان ورتانى كوگالداندىرۋدى قولعا الايىق. مۇنداي شارالاردى بارلىق ايماقتا ۇيىمداستىرۋىمىز قاجەت. بۇل – اتا سالتىمىز جانە ۇرپاققا ەكولوگيالىق تاربيە بەرۋدىڭ ەڭ ءتيىمدى جولى»، – دەگەن تاپسىرماسىنا ساي جۇزەگە استى.
سونىمەن قاتار قازاقستان پرەزيدەنتى قاسىم-جومار توقاەۆ «تاۋەلسىزدىك بارىنەن قىمبات» اتتى باعدارلامالىق ماقالاسىندا «ناۋرىز مەيرامىن اتاپ ءوتۋ تۇجىرىمداماسىن جاساپ، كوكتەم مەرەكەسىنىڭ مازمۇنىن بايىتا تۇسكەن ءجون. بۇكىل قوعامدى ۇيىستىراتىن قۇندىلىقتار نەعۇرلىم كوپ بولسا، بىرلىگىمىز دە سوعۇرلىم بەكەم بولادى. ىنتىماعى جاراسقان جۇرتتىڭ قاشاندا ۇپايى تۇگەل»، – دەپ اتاپ ءوتىپ، ءاز ناۋرىزعا جاڭاشا كوزقاراس قاجەتتىگىن جەتكىزگەن بولاتىن.
ەستەرىڭىزگە سالا كەتسەك، قازۇۋ «ناۋرىز مەيرامىن تويلاۋ تۇجىرىمداماسىنا» سايكەس، «كورىسۋ كۇنى»، «جايلاۋ كۇنى»، «شەجىرە كۇنى»، «تاريحقا تاعزىم كۇنى»، «يگى ىستەر كۇنى»، «شىمىرلىق پەن شەبەرلىك كۇنى»، «زياتكەرلىك كۇنى»، «ۇلتتىق تاعامدار كۇنى»، «ۇلىستىڭ ۇلى كۇنى» جانە «جورالعى كۇنىن» قاشىقتىقتان اتاپ وتۋدە.
ءال-فارابي اتىنداعى قازۇۋ-دىڭ باسقارما توراعاسى- رەكتور جانسەيىت تۇيمەباەۆ ءوز سوزىندە الداعى ۋاقىتتا دا كامپۋستاعى جاتاقحانا كورپۋستارىنىڭ جانىنداعى بوس ورىنداردارعا اعاشتار وتىرعىزىپ، اينالانى جاسىل جەلەككە اينالدىرۋ كەرەكتىگىن اتاپ ءوتتى. سونداي-اق الىس جاپونيا ەلىنە ساكۋرانىڭ گۇلدەنۋىن كورۋ ءۇشىن اتتانباي-اق، تابيعاتى اسەم قازۇۋ قالاشىعىندا ستۋدەنت جاستارىمىز ءۇشىن ارنايى شيە جانە الما اعاشتارىنىڭ اللەياسىن بولەك اشۋدى ۇسىندى. بۇل جوبا ىسكە اسىرىلسا، جەمىس اعاشتارى اللەياسى ستۋدەنتتەردىڭ، قوناقتار مەن قالا تۇرعىندارىنىڭ سۇيىكتى ورىندارىنىڭ بىرىنە اينالماق.
«ادىرنا» ۇلتتىق پورتالى
