قىزىلوردادا كوروناۆيرۋس ينفەكتسياسىنا قارسى ەكىنشى مارتە ۆاكتسينا سالدىرعاندار اراسىندا كوپبەيىندى وبلىستىق بالالار اۋرۋحاناسىنىڭ 15 قىزمەتكەرى بار، دەپ حابارلايدى “ادىرنا” ۇلتتىق پورتالى قازاقپاراتقا سىلتەمە جاساپ.
ەستەرىڭىزگە سالا كەتەلىك، 22 اقپاننان باستاپ وڭىردە ۆاكتسينانىڭ ەكىنشى دوزاسىن ەگۋ باستالدى.
وبلىسقا اقپان ايىنىڭ العاشقى كۇنىندە «سپۋتنيك V» ۆاكتسيناسى جەتكىزىلىپ، ناتيجەسىندە 1000 ادامعا ەكپە ەگىلدى. ولاردىڭ باسىم بولىگى - مەديتسينا قىزمەتكەرلەرى. ەكپە قابىلداعان ازاماتتارعا اراعا ءۇش اپتا سالىپ ەكىنشى مارتە ەكپە ەگۋ جۇرگىزىلۋدە.
ايتا كەتەرلىگى، 2 ناۋرىزعا دەيىن 505 ادام ەكىنشى مارتە ۆاكتسينا سالدىرعان بولاتىن. ولاردىڭ قاتارىن كەشە تاعى 50 ادام تولىقتىردى.
ەكپە قابىلداعان تۇرعىندار قاتارىندا كوپبەيىندى وبلىستىق بالالار اۋرۋحاناسىنىڭ 15 قىزمەتكەرى بار. مامانداردىڭ ايتۋىنشا، بۇل جولعى ەكپە الدىڭعى ۆاكتسينانىڭ اسەرىن كۇشەيتەدى.
«الەمدى كوروناۆيرۋس ينفەكتسياسىنان قورعانۋ - باستى مىندەتىمىز. قاتەرلى ىندەتتى ساقتىق شارالارىن تولىققاندى جاساعاندا عانا جەڭە الامىز»، - دەدى اۋرۋحانا باس دارىگەرىنىڭ ورىنباسارى ساۋلەبەك ىسقاقوۆ.
ونىڭ ايتۋىنشا، ۆاكتسينا اعزاداعى قورعانىس قابىلەتىن ارتتىرادى. ول اۋرۋدىڭ الدىن الۋعا سەپتىگىن تيگىزەدى.
«ءوزىم ەرىكتى تۇردە 1 اقپاندا ەكپە قابىلدادىم. ارادا ءۇش اپتاداي ۋاقىت ءوتتى. ەكپەنىڭ ەش كەرى اسەرىن بايقاعان جوقپىن. سول سەبەپتى ەكپەنىڭ ەكىنشى كەزەڭىنەن ءوتتىم»، - دەدى اۋرۋحانانىڭ باس مەيىربيكەسى زابيرا المۋرزاەۆا.
