بۇگىن دەنساۋلىق ساقتاۋ ءمينيسترى الەكسەي تسوي ۇكىمەت وتىرىسىندا قازاقستان رەسپۋبليكاسىنداعى سانيتارلىق-ەپيدەميولوگيالىق جاعداي تۋرالى باياندادى، دەپ حابارلايدى «ادىرنا» ءتىلشىسى مينيسترلىكتىڭ ءباسپاسوز قىزمەتىنە سىلتەمە جاساپ.
«مينيسترلىك كۇن سايىن ماتريتساعا سايكەس ەپيدجاعدايعا باعالاۋ جۇرگىزەدى. اعىمداعى جىلدىڭ باسىنان باستاپ ورتاشا تاۋەكەل ايماعىنان جوعارى تاۋەكەل ايماعىنا نەمەسە سارىدان قىزىل ايماققا 3 ءوڭىر – قوستاناي، پاۆلودار وبلىستارى جانە نۇر-سۇلتان قالاسى ءوتتى. تومەن تاۋەكەل ايماعىنان ورتاشا تاۋەكەل ايماعىنا نەمەسە جاسىل ايماقتان سارى ايماققا 2 ءوڭىر: الماتى جانە قاراعاندى وبلىستارى كوشتى»، - دەدى ا.تسوي.
وسىلايشا، 19 قاڭتاردا قىزىل ايماقتا 6 ءوڭىر بار: اقمولا، اتىراۋ، قوستاناي، پاۆلودار، سولتۇستىك قازاقستان وبلىستارى جانە نۇر-سۇلتان قالاسى. 3 وبلىس سارى ايماقتا: باتىس قازاقستان، الماتى جانە قاراعاندى وبلىستارى. قالعان 8 ءوڭىر جاسىل ايماقتا.
دەنساۋلىق ساقتاۋ مينيسترلىگىنىڭ بولجاۋ جونىندەگى جۇمىس توبى مىندەتتى ماسكا رەجيمىن، الەۋمەتتىك قاشىقتىقتى ساقتاۋدى جانە كۇتىلەتىن ۆاكتسيناتسيانى قوسا العاندا، قولدانىستاعى شەكتەۋ شارالارى ساقتالعان جاعدايدا 2021 جىلدىڭ سوڭىنا دەيىن ەپيدجاعدايدىڭ دامۋىنا بولجام جاسادى.
جاعدايلار وسى جىلدىڭ ناۋرىز ايىنىڭ سوڭىندا كوپ تىركەلۋى مۇمكىن. وپتيميستىك ستسەناري بويىنشا تاۋلىگىنە 3 مىڭ جاعدايعا دەيىن كۇتىلۋدە، ال توسەك قورىنىڭ بارىنشا قامتىلۋى 24 مىڭ ورىنعا دەيىن جەتۋى مۇمكىن. دەگەنمەن، اتالعان ستسەناري كەزىندە قاتاڭ كارانتيندىك شارالاردى ەنگىزۋ جوسپارلانىپ وتىرعان جوق.
«ادىرنا» ۇلتتىق پورتالى
