پارلامەنت ءماجىلىسىنىڭ 98 مانداتىنا 5 ساياسي پارتيانىڭ تالاساتىنى بەلگىلى. 2021 جىلدىڭ 10-شى قاڭتارىندا وتەتىن سايلاۋدىڭ ۇگىت-ناسيحاتتىق جۇمىسى باستالىپ تا كەتتى. وسى رەتتە «ادىرنا» ۇلتتىق پورتالىنىڭ ءتىلشىسى «ادال» پارتياسىنىڭ وكىلى نازىم جانعازيەۆامەن اڭگىمەلەسىپ، سايلاۋالدى دايىندىعىن سۇراپ ءبىلدى.
–نازىم حانىم، "ادال" پارتياسى باعدارلاماسىنىڭ نەگىزگى باعىتتارى قانداي؟
– «ADAL» پارتياسىنىڭ باعدارلاماسى 5 نەگىزگى باعىتتان تۇرادى:
1) حالىقتىڭ ءومىر ءسۇرۋ ساپاسىن كوتەرۋ;
2) كاسىپكەرلىك – دامىعان مەملەكەتتىڭ ىرگەتاسى;
3) اگروونەركاسىپتىك كەشەندى دامىتۋعا باسىمدىق بەرۋ;
4) وڭىرلەردىڭ وركەندەۋى – قۋاتتى مەملەكەت دىڭگەگى;
5) ءومىر سۇرۋگە قولايلى مەملەكەت.
–پارتيا قۇرامىنا كوپتەگەن ىسكەر جاستاردى جيىپ جاتىر. ولاردىڭ قاتارىندا ماقسات تولىقباي، ارداق نازاروۆ سەكىلدى تانىمال ازاماتتار بار. ياعني، پارتيا جاستارعا ءۇمىت ارتاتىن سياقتى. سولاي ما؟
–كوروناۆيرۋس پاندەمياسى بىزگە ەسكى ادىستەر بۇگىندە قاجەتسىز بولىپ قالعانىن تۇسىنۋگە مۇمكىندىك بەردى. ءبىز ساياسي لاندشافتتا بەيىمدەلگىش، يكەمدى، كەز كەلگەن وزگەرىستەرگە ەنىپ كەتە الاتىن جاستارعا مۇمكىندىك بەرۋ قاجەت دەپ سانايمىز. ءبىز تۋربۋلەنتتى ۋاقىتتا ءومىر ءسۇرىپ جاتىرمىز، سوندىقتان قازىر 5 جىل بۇرىن بەلگىلەگەن ستراتەگيالار مەن مىندەتتەر ماڭىزدى ەمەس. كۇن ءتارتىبىن، جۇمىس باعىتىن وزگەرتۋ قاجەت. بۇل –امبيتسياسى مول جاستاردىڭ كۇشىمەن عانا جۇزەگە اسادى.
قر پارلامەنتى ماجىلىسىنە دەپۋتاتتىققا كانديداتتاردىڭ 16-سى ءوز سالاسىنىڭ ساراپشىلارى. جانە دە ولاردىڭ ارقايسىسى ءوز قىزمەت سالاسىنىڭ دامۋىنا زور ۇلەس قوسىپ كەلەدى. ءبىز ولاردىڭ تاجىريبەسى «ADAL» پارتياسى قىزمەتىنىڭ بارلىق باعىتتارى بويىنشا قولدانىلاتىنىنا سەنىمدىمىز.
- وزگە پارتيالارمەن دەباتقا شىعۋعا دايىنسىزدار ما؟
–ارينە، بىراق كەز-كەلگەن پارتيانىڭ ءار مۇشەسىنىڭ بەلگىلى ءبىر ماقساتى بار. ەڭ باستىسى، ءاربىر قازاقستاندىقتىڭ ءومىر ءسۇرۋ ساپاسىن جاقسارتۋ. سونداي-اق ءاربىر قازاقستاندىقتىڭ يگىلىگى ءۇشىن جۇمىس ىستەۋ. ءبىز ەشكىمدى سىناي المايمىز. ءار پارتيانىڭ پىكىرىن قۇرمەتتەيمىز. پىكىرتالاسقا ءبىز دايىنبىز.
– ءۇگىت-ناسيحات جۇمىستارى رەسمي تۇردە باستالدى. كارانتين تالاپتارى سايلاۋشىلارمەن كەزدەسۋگە قانشالىقتى اسەر ەتەدى دەپ ويلايسىزدار؟
ء–بىز كارانتين شارالارىنىڭ بارلىق تالاپتارىن بارىنشا ساقتايتىن بولامىز. ءبىز ءۇشىن ءار وڭىرگە بارىپ، ادامدارمەن كەزدەسىپ، بارلىق ءىس-شارالاردا قاتىسۋ وتە ماڭىزدى.
حالىقپەن كەزدەسۋگە ءسوزسىز باسىمدىق بەرىلەدى. بىراق ءبىز دەنى ساۋ ۇلت ءۇشىن كۇش سالاتىن «ADAL» پارتياسىمىز. ءبىزدىڭ ءاربىر كەڭسەلەرىمىزدە، پۋنكتتەرىمىزدە سانيتارلىق تالاپتاردى ساقتاۋعا قاجەت نارسەنىڭ ءبارى بولادى: ماسكالار، سانيتايزەرلەر، قولعاپتار. الەۋمەتتىك اراقاشىقتىق مىندەتتى تۇردە ساقتالادى.
- پىكىرىڭىزگە راقمەت!
اڭگىمەلەسكەن گۇلۆيرا اسقارقىزى،
«ادىرنا» ۇلتتىق پورتالى
