شىمكەنتتە تويحانا ەسىگىن جاۋىپ، 300 ادامعا جيىن ۇيىمداستىرعاندار انىقتالدى، – دەپ حابارلايدى «ادىرنا» ۇلتتىق پورتالى Polisia.kz-كە سىلتەمە جاساپ.
كارانتين تالاپتارىن ەلەمەگەندەر اباي اۋدانى بويىنشا جۇرگىزىلگەن جەدەل پروفيلاكتيكالىق ءىس-شارالاردىڭ بارىسىندا انىقتالدى. ماسەلەن، شىمكەنت قالاسى جيدەلى بايسىن كوشەسىنىڭ بويىندا ورنالاسقان “گراند سۇلتان” تويحاناسىنىڭ ءۇش بىردەي زالىندا توي-جيىن ۇيىمداستىرىلعانى بەلگىلى بولدى. قۇرامىندا پوليتسەيلەر مەن اۋداندىق اكىمدىك وكىلدەرى بار ءموبيلدى توپ وكىلدەرى كەلگەن دە عيماراتتىڭ ەسىگى جابىق تۇرعان. الايدا بۇل كەزدە نىساننىڭ ءۇش بىردەي ۇلكەن زالىندا ءدۇبىرلى توي بولىپ جاتقان مۋزىكانىڭ داۋىسى شىعىپ تۇرعان ەدى. قۇزىرلى ورگان قىزمەتكەرلەرى اقىرى تويحانا ەسىگىن اشىپ، قوناقتاردى تارقاتتى. ال كارانتين تالاپتارىن ورەسكەل بۇزعان تويحانا يەسىنەن تۇسىنىكتەمە الىندى.
اتالعان جايت بويىنشا قر اقبتك-ءنىڭ 425-بابىنىڭ 1-بولىگىمەن شارا كورۋ ءۇشىن اباي اۋدانىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا ءىس-قۇجاتتار جولداندى.
«ادىرنا» ۇلتتىق پورتالى
