قر پارلامەنتى سەناتىنىڭ دەپۋتاتتارى پلەنارلىق وتىرىستا ەۋرازيالىق ەكونوميكالىق وداققا مۇشە مەملەكەتتەردىڭ ەڭبەكشىلەرىن زەينەتاقىمەن قامسىزداندىرۋ تۋرالى كەلىسىمدى قاراپ، ونى راتيفيكاتسيالاۋدى قابىلدادى،دەپ حابارلايدى «ادىرنا» ۇلتتىق پورتالى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
جوعارىدا اتالعان كەلىسىمگە 2019 جىلعى 20 جەلتوقساندا قول قويىلدى. قۇجات ەۋرازيالىق ەكونوميكالىق وداق تۋرالى شارت شەڭبەرىندە ەاەو-عا قاتىسۋشى ەلدەردىڭ ىنتىماقتاستىعىن تەرەڭدەتۋدىڭ ناتيجەسى بولىپ تابىلادى. ەاەو ازاماتتارىن باسقا مۇشە مەملەكەتتەردە ەڭبەك قىزمەتىن جۇزەگە اسىرۋى كەزىندە زەينەتاقىمەن قامسىزداندىرۋ ماسەلەسىن قۇقىقتىق رەتتەۋ جۇمىس كۇشىنىڭ قوزعالۋى جولىنداعى قازىرگى كەدەرگىنى جويۋعا مۇمكىندىك بەرەدى جانە ەڭبەك قىزمەتىن زاڭداستىرۋعا قوسىمشا ىنتالاندىرۋ بولادى.
كەلىسىم كۇشىنە ەنگەننەن كەيىن ەاەو-عا مۇشە مەملەكەتتەردىڭ ازاماتتارى ەڭبەك قىزمەتىن جۇزەگە اسىرعان مەملەكەتتىڭ ازاماتتارى سياقتى زەينەتاقىمەن قامسىزداندىرىلۋعا قۇقىلى بولادى. ەاەو-عا قاتىسۋشى ءاربىر ەل ەڭبەك ەتۋشىگە ونىڭ اۋماعىندا جيناقتالعان جۇمىس ءوتىلى ءۇشىن زەينەتاقى تولەيتىن (ەكسپورتتايتىن) بولادى. ەاەو-نىڭ باسقا ەلىندە تۇراتىنىنا قاراماستان، ەڭبەك ەتۋشىگە زەينەتاقىنى ول ەڭبەك قىزمەتىن جۇزەگە اسىرعان ەاەو-عا مۇشە مەملەكەت تولەيتىن بولادى. بىرىڭعاي جيناقتاۋشى زەينەتاقى قورى قازاقستاندا كەلىسىمدى ىسكە اسىرۋ بويىنشا قۇزىرەتتى ورگان بولىپ بەلگىلەندى.
زەينەتاقى تولەمدەرىن تاعايىنداۋ بويىنشا بارلىق سۇراقتار بويىنشا قر جانە ەاەو-عا مۇشە باسقا مەملەكەتتەردىڭ ازاماتتارى بجزق-عا تىكەلەي جۇگىنەتىن بولادى. كەلىسىم بويىنشا ەاەو-نىڭ باسقا مەملەكەتتەرىنىڭ ەڭبەكشىلەرىنە قازاقستاندا جيناقتاۋشى زەينەتاقى جۇيەسىنەن زەينەتاقى تولەمدەرى جۇزەگە اسىرىلاتىن بولادى، ويتكەنى ولار قر-دا تۇراقتى تۇراتىن ازاماتتارمەن جانە شەتەلدىكتەرمەن تەڭ جاعدايدا ۇلتتىق زەينەتاقى زاڭناماسىندا بەلگىلەنگەن تارتىپپەن جانە شارتتاردا بجزق-عا مزج اۋدارادى.
«ادىرنا» ۇلتتىق پورتالى
