اعىمداعى جىلعى 19 قاراشادا سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ جۇمىس ساپارىمەن اقتوبە وبلىسىنا كەلدى.
ساپار بارىسىندا ول اقتوبە وبلىسىنىڭ حرومتاۋ قالاسىنا تابان تىرەپ، مەملەكەتتىك كىرىستەر باسقارماسىنىڭ كليەنتكە باعدارلانۋىمەن تانىستى جانە حرومتاۋ اۋدانىنىڭ «اشىق اكىمدىك» قىزمەتىن تەكسەردى.
ۆەدومستۆو باسشىسى الەۋمەتتىك سالا، تكش جانە جەر قاتىناستارى ماسەلەلەرى بويىنشا ءوتىنىش بىلدىرگەن جەرگىلىكتى ازاماتتاردى جەكە قابىلدادى. مىسالى، كوشەنى جارىقتاندىرۋ، ونى اباتتاندىرۋ، جۇمىسقا ورنالاستىرۋ، بايلانىس قىزمەتىن جاقسارتۋ، مۇگەدەك بالاعا جاردەمدەسۋ جانە ت.ب. ماسەلەلەر بويىنشا وتىنىشتەر ءتۇستى.
«بارلىق وتىنىشتەر جەرگىلىكتى اتقارۋشى ورگانداردىڭ جەكە باقىلاۋىنا الىنىپ، جاۋاپتى تۇلعالار بەكىتىلدى. اۋماقتىق دەپارتامەنتكە ءاربىر ءوتىنىشتى زەردەلەپ، ونى ەگجەي-تەگجەيلى قاراپ شىعۋ تۋرالى تاپسىرما بەرىلدى»، - دەپ اتاپ ءوتتى اليك شپەكباەۆ. سونداي-اق، تۇرعىندار «ءبىر تەرەزە» قاعيداتى بويىنشا ازاماتتارعا جەدەل جانە كەدەرگىسىز قىزمەت كورسەتۋگە باعدارلانعان جەرگىلىكتى سەرۆيستىك اكىمدىكتىڭ جۇمىسىن وڭ باعالادى.
سونداي-اق، سەرۆيستىك اكىمدىك جانىندا ازاماتتاردى جەكە قابىلداۋ جانە كەڭەستەر وتكىزۋ ءۇشىن «Open Space» نىسانىنداعى كابينەت بار. وندا «ادال كومەك» جوباسىنىڭ جەتەكشىسى ايمان وماروۆانىڭ وڭىرگە ساپارى اياسىندا تەگىن زاڭ كومەگى ۇيىمداستىرىلدى.
حرومتاۋ اۋدانىنىڭ «اشىق اكىمدىگىنە» اعىمداعى جىلدىڭ باسىنان بارلىعى 600-دەن استام ءوتىنىم حات، 500-دەن استام ءوتىنىش جانە وزگە دە ساۋالدار كەلىپ ءتۇستى. اكىمنىڭ جەكە قابىلداۋلارى اياسىندا 95 ءوتىنىش ءتۇستى. بۇدان باسقا، حرومتاۋ اۋدانىنىڭ اتقارۋشى ورگاندارى تىزىلىمگە سايكەس مەملەكەتتىك قىزمەتتىڭ 82 ءتۇرىن كورسەتەدى. جىل باسىنان بەرى 8000-نان استام قىزمەت كورسەتىلدى. ەلەكتروندىق قىزمەتتەردى الۋ ءۇشىن وزىنە-ءوزى قىزمەت كورسەتۋ بۇرىشتارى دا قاراستىرىلعان.
«مەملەكەت باسشىسى ق. توقاەۆتىڭ باستاماسىمەن قولعا الىنعان «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ اياسىندا اگەنتتىك ازاماتتىق قوعاممەن ءوزارا ءىس-قيمىلدى كۇشەيتۋدە.
مەملەكەتتىك ورگانداردىڭ اشىقتىعى مەن ايقىندىعىن ارتتىرۋدىڭ ءتيىمدى قۇرالى – حالىق الدىندا قولجەتىمدىلىك پەن ەسەپ بەرۋدى قامتاماسىز ەتۋ. سوندىقتان مەملەكەتتىك اپپارات حالىقپەن مۇمكىندىگىنشە ءجيى كەزدەسىپ، ونىڭ مۇڭ-مۇقتاجىن تىڭداپ، ازاماتتاردىڭ ماسەلەلەرىن جەدەل شەشۋى كەرەك»، - دەدى اگەنتتىك توراعاسى.
جالپى بۇگىنگى كۇنى اقتوبە وبلىسىنىڭ بارلىق اۋداندىق جانە قالالىق اكىمدىكتەرىندە «Open Space» ۇلگىسىندە 15 سەرۆيستىك اكىمدىك جانە 65 كابينەت جۇمىس ىستەيدى.
حرومتاۋ اۋدانىنىڭ بىرقاتار مەكەمەلەرىن ارالاعاننان كەيىن اليك شپەكباەۆ اۋدان جۇرتشىلىعى وكىلدەرىمەن كەزدەسىپ، سىبايلاس جەمقورلىققا قارسى زاڭنامانىڭ نوۆەللالارى، قول استىنداعىلاردىڭ سىبايلاس جەمقورلىعى ءۇشىن باسشىلاردىڭ دەربەس جاۋاپكەرشىلىگى جانە نقا سىبايلاس جەمقورلىققا قارسى ساراپتاما جۇرگىزۋدىڭ جاڭا تەتىكتەرى تۋرالى ايتىپ بەردى.
سونداي-اق، «Protecting business and investments» بيزنەس پەن ينۆەستيتسيالاردى سىبايلاس جەمقورلىققا قارسى سۇيەمەلدەۋ بويىنشا جوبانىڭ ىسكە اسىرىلۋ بارىسىمەن تانىسۋ ماقساتىندا سىبايلاس جەمقورلىققا قارسى قىزمەت باسشىسى «Arm Wind» جشس جەل ەلەكتر ستانتسياسىنا، «ەكوفەرما» جشس قۇلپىناي وسىرەتىن جىلىجايعا، «اقتوبە» الەۋمەتتىك-كاسىپكەرلىك كورپوراتسياسى» اق-عا جانە وبلىستىڭ باسقا دا بىرقاتار كاسىپورىندارىنا بارۋدى جوسپارلاپ وتىر.
