«اۋىل» پارتياسى اۋىل شارۋاشىلىعى تاۋارلارىن وندىرۋشىلەرگە جىلدىق وتەماقىسى 2 پايىزدى قۇرايتىن نەسيە بەرۋ جۇيەسىن ۇسىنادى. بۇل تۋرالى «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆ ايتتى، دەپ حابارلايدى قازاقپارات ءتىلشىسى.
«قازاگرو» حولدينگى مەن ونىڭ ەنشىلەس ۇيىمدارىنا جىل سايىن قوماقتى سوما بولىنسە دە، شارۋالاردىڭ قارجى قاجەتتىلىگىنىڭ جارتىسى عانا وتەلۋدە. نەسيە سىياقىسىن سۋبسيديالاۋ باعدارلاماسى جاسالسا دا، ەكىنشى دەڭگەيلى بانكتەردىڭ اۋىل شارۋاشىلىعىنا بەت بۇرعىسى جوق. ءبىز ءوزىمىزدىڭ سايلاۋالدى باعدارلامامىزدا اۋىل شارۋاشىلىعى تاۋارلارىن وندىرۋشىلەرىنە ۇزاق مەرزىمدى، جىلدىق وتەماقىسى 2 پايىزدى قۇرايتىن نەسيەلەر بەرۋ جۇيەسىن قالىپتاستىرۋدى ۇسىنىپ وتىرمىز. وسىنداي قولداۋ ارقىلى عانا اۋىل ءوندىرىسىن كوتەرۋگە بولادى دەپ ەسەپتەيمىز»، - دەدى ول پارتيانىڭ كەزەكتەن تىس XVIII سەزىندە.
ونىڭ پايىمىنشا، مەملەكەتىمىزدە اگرارلىق سەكتور ەكونوميكانى العا سۇيرەيتىن لوكوموتيۆ بولاتىنىنا كۇمان جوق. «اۋىل شارۋاشىلىعى بولاشاقتا مۇناي مەن گاز سياقتى جەراستى بايلىقتارىنىڭ ورنىن باساتىن جەردىڭ ۇستىندەگى التىن قازىناعا اينالاتىن مۇمكىندىگى بار. «التىن، كۇمىس – تاس ەكەن، ارپا، بيداي اس ەكەن»، - دەگەن ماتەلدىڭ زامانى كەلدى. ادامعا قىمبات ءۇي، كيىم، كولىك ەمەس، ەڭ الدىمەن اس كەرەك، سول ارقىلى مىقتى دەنساۋلىق كەرەك»، - دەدى ءالي بەكتاەۆ.
