«اق جول» دەموكراتيالىق پارتياسى فراكتسياسىنىڭ دەپۋتاتتارى بارىنشا زاراپ شەككەن شاعىن جانە ورتا بيزنەس كرەديتتەرىن 6 پايىزبەن ءىس جۇزىندە قايتا قارجىلاندىرۋدى كىدىرىسسىز باستاۋدى تالاپ ەتتى، دەپ حابارلايدى «ادىرنا» ۇلتتىق پورتالى قازاقپارات-قا سىلتەمە جاساپ.
«قر پرەزيدەنتى وسى جىلدىڭ 1 قاڭتارىنداعى جولداۋىندا «ەكونوميكانىڭ زارداپ شەككەن سەكتورىنداعى شاعىن جانە ورتا بيزنەستىڭ بارلىق قولدانىستاعى كرەديتتەرى بويىنشا جىلدىق 6 پايىزدىق مولشەرلەمەمەن مەملەكەتتىك سۋبسيديالاۋدى قامتاماسىز ەتۋ قاجەت» دەگەن بولاتىن. سونىمەن قاتار پرەزيدەنت بۇل ماقساتقا قوسىمشا 200 ملرد تەڭگە بولىنەتىندىگىن، ال سۋبسيديالاۋ باعدارلاماسىنىڭ جالپى كولەمى 800 ملرد تەڭگەگە جەتكىزىلەتىندىگىن حابارلاعان ەدى. بۇل تاپسىرما كاسىپكەرلىك قوعامداستىق اراسىندا ۇلكەن رەزونانس تۋدىردى»، - دەدى پرەمەر-مينيستر اسقار ءماميننىڭ اتىنا دەپۋتاتتىق ساۋال جولداعان ازات پەرۋاشەۆ. ءماجىلىس دەپۋتاتىنىڭ دەرەگىنشە، تىكەلەي پاندەميادان جانە ونىمەن بايلانىستى شارالاردان 1 ميلليوننان استام كاسىپكەر زارداپ شەكتى. بۇل ەلىمىزدە تىركەلگەن بيزنەس سۋبەكتىلەرىنىڭ ۇشتەن ەكىسىن قۇرايدى. توتەنشە جاعدايعا جانە لوكداۋن شەكتەۋلەرىنە بايلانىستى 430 مىڭنان استام كاسىپكەر جۇمىسىن توقتاتىپ، ونىڭ باسىم بولىگى ءالى كۇنگە دەيىن قىزمەتىن جانداندىرعان جوق. اسىرەسە كولىك، ساۋدا جانە قىزمەت كورسەتۋ، قوعامدىق تاماقتانۋ، قوناق ءۇي بيزنەس، جىلجىمايتىن مۇلىكپەن بايلانىستى وپەراتسيالار سالالارى ۇلكەن شىعىنعا باتتى. الايدا مەملەكەت باسشىسىنىڭ تاپسىرماسىنا سايكەس ەلىمىزدىڭ بارلىق وڭىرلەرىندەگى شاعىن جانە ورتا بيزنەس سۋبەكتىلەرىنىڭ كرەديتتەرىن قايتا قارجىلاندىرۋ جۇرگىزىلمەي وتىر. «وسىعان وراي ءبىز ۇكىمەتتەن، ۇلتتىق بانكتەن جانە قر قارجى نارىعىن رەتتەۋ جانە دامىتۋ اگەنتتىگىنەن زارداپ شەككەن بارلىق شاعىن جانە ورتا بيزنەستىڭ كرەديتتەرىن 6 پايىزبەن قايتا قارجىلاندىرۋدى شۇعىل، كىدىرتپەستەن باستاۋدى وتىنەمىز. سونىمەن قاتار پرەزيدەنت جولداۋىنىڭ ورىندالۋىن ءسوز بۇيداعا سالعان لاۋازىمدى تۇلعالاردى انىقتاپ، جاۋاپكەرشىلىككە تارتۋدى سۇرايمىز»، - دەدى ازات پەرۋاشەۆ.
فوتو اشىق دەرەككوزدەن الىندى
«ادىرنا» ۇلتتىق پورتالى
